آش هذشي واقع فموقع "كورونا" الرسمي دالوزارة؟ اغلب الوقت طايح وفاش كيخدم كلها وكيعطيه رقم اصابات مبدل.. والصحافيين لقاو صعوبة فالوصول للمعلومة

الموقع ديال وزارة الصحة المتعلق بالرصد الصحي لمدى انتشار فيروس "كورونا covid19" فيه مشكل كبير، الصحافيين والناس كيدخلو ليه على أساس يلقاو معلومات دقيقة ومحينة، لكن للاسف كيلقاو فبعض المرات باللي الموقع طايح، وفاش كيكون خدام كيلقاو مشكل فالميز آجور.
اليوم فالصباح كاينين صحافيين دخلو باش يتقصاو معلومات جديدة على هذ "الفيروس" اللي ولا يهدد فعلا الصحة العامة فالمغرب، لكنهم لقاو المعطيات القديمة ديال لبارح: فقط 96 إصابة بالفيروس و441 مستبعدة بعد التحليل المخبري، فالوقت اللي الموقع عند وحدين خرين مافيه حتى مشكل، وكيبين آخر الأرقام.
عدد الإصابات فالواقع ارتفع ل104، وكاينة 490 حالة مستبعدة بعد التحليل المخبري، هذ المعطى للأسف ماوصلش كلشي، ووقع واحد الخلط كبير عند الصحافيين، ولقاو صعوبة باش يوصلو للمعلومة الدقيقة.
فغياب أي بلاغ رسمي من عند الوزارة، وبحكم أن الموقع ديال فيروس "كورونا" فيه هذ المشكل، المعلومة ضاعت من يد الصحافيين، فالوقت اللي خاص الوزارة تدير كَاع مجهودها باش تنور الراي العام وتتفادى هذ الهفوات.
وممكن يكون الضغط الكبير اللي كاين على الموقع هو السبب، لكن هذشي خلا شحال من واحد ما يتيقش بللي الإصابات تزادو، ويعتبر أن المعلومة مفبركة، وهذشي علاش خاص الوزارة ترد البال، حيت هذ الظرفية صعيبة والمعلومة مهمة وخاص توصل للمواطن بشكل دقيق.