ابتداء من صباح اليوم، قررات الصيدليات ديال كازا باش تشتغل، بدون انقطاع، من الاثنين حتى للجمعة، من 9 دالصباح حتى ل6 دالعشية، ومن 9 حتى ل2 كل خميس. كذلك، بعض الصيدليات غايديرو البيرمانونص من 6 حتى ل12 دلليل، وشي خمسين صيدلية غدي تخدم من السبت من 2 دالليل حتى للاثنين مع 9 ديال النهار. هذ المعلومات تكلف محمد لحبابي، رئيس كونفيدرالية نقابة صيادلة المغرب، بتعميمها على المواطنين باش يكونو على علم، عبر مواقع التواصل الاجتماعي وتطبيق "واتساب". فتصريحو ل"كود" قال لحبابي بللي الصيادلة غايزيدو فساعات العمل ديالهم، وغادي يفورسيو البيرمانونس ودورات الحراسة كثر من المعتاد، وهذشي بناء على الظرفية اللي كيعرفها المغرب بعد إعلان حالة الطوارئ الصحية، وتفشي فيروس "كورونا". وأكد الحبابي بللي جات لنقابتهم أخبار بللي الداخلية غادي تتاخذ قرارات بتغيير ساعات اشتغال الصيادلة باش يخدمو لوقت أطول، "وهذ القرار اللي خدينا حنا هو استباقي فقط، وكيتعلق بصيادلة كازا، والوزارة غادي تصدر قرارات ولائية لكل مدينة بوحدها".
