رئيس المراقبة فميناء طنجة ل”كود”: الرحلات البحرية من الطاليان توقفات ولبارح فالعشية جا آخر باطو من تما

قال عبد الرحيم رشدي، رئيس مصلحة المراقبة الصحية بميناء طنجة المتوسطي، بللي جميع الرحلات البحرية من الطاليان للمغرب توقفات اليوم، وبللي آخر باطو جا من تماك كان وصل لبارح فالعشية.
رشدي قال، فتصريحو ل”كود” بللي ناس اللي جاو من الباطو تقلبو مزيان، وتراقبات الحالة الصحية ديالهوم بالكمرات الحرارية وبمعدات طبية أخرى، وكانت إجراءات المراقبة اكثر تشدد، و”والحمد لله ما سجلنا حتى شي حالة مشتبه فيها”.
وبالنسبة لردو على ما جاء فالفيديو اللي نتشر بشكل كبير على مواقع التواصل الاجتماعي، ديال ناس محبوسين فطوموبيلاتهم فالحدود ديال طنجة فالصبتح، وماخلاوهومش الجمارك يدخلو، قال رشدي بللي ماعندوش علم بهذشي، وبللي فالغالب غايكونوا تعطلو معاهم الجمارك غير فالإجراءات الجمركية اللي خاصهم يديروها معاهم، من بعد ما انتشر الفيروس فالطاليان بشكل كبير.
وحاولات “كود” تتصل ببنداوود، بالمسؤول على الجمارك المنظمة لعمليات العبور فطنجة، باش يعطي إفادتو فموضوع الفيديو ديال المغاربة اللي بقاو حاصلين فحدود طنجة، لكن التيليفون ديالو مشغول.
هذشي وتم الإعلان اليوم كذلك على وقف الرحلات الجوية بين المغرب والطاليان، بعدما صبحات هذ البلاد هي الثانية عالميا على مستوى انتشار الفيروس، وولات خاضعة كلها للحجر الصحي، وتم فيها منع الخروج من المنازل والجولان والتسركيل، إلا للضرورة القصوى.