رجال الأمن اللي صلاو عليه وممنوع على العائلة تشوفو.. موظف فوكالة الماء والكهرباء عاود ل"كود" تفاصيل دفن سيد مات بفيروس "كورونا" فمكناس

هذ المشهد للأسف يمكن يتكرر فمراسيم دفن موتى خرين تصابو بفيروس "كورونا" القاتل، لبارح الأربعاء، مجموعة محدودة من الناس صلاو على المتوفى بالفيروس صلاة الجنازة، قدام مقبرة بوعياد اللي جات فحي الزيتون فمكناس.
تصاور ديال صلاة الجنازة اللي شعلات مواقع التواصل الاجتماعي، اليوم ولبارح، تأسفو ليها بزاف ديال الناس، خصوصا وأن العدد اللي أدى الصلاة على المتوفى (ك.ب) كيبان قليل، فغياب تام لأفراد عائلتو اللي تمنعو باش يشوفوه ويودعوه لآخر مرة.
موظف فالوكالة المستقلة لتوزيع الماء والكهرباء بمكناس كيحكي ل"كود" تفاصيل دفن السيد، اللي كان هو الرئيس ديالو المباشر فالمصلحة التجارية فالوكالة قبل مايخرج تقاعد، كيقول: "المتوفى هو إطار متقاعد، وكان رئيس مصلحة الزبناء والمصلحة التجارية، مشا مؤخرا فرحلة سياحية لمصر هو مرتو مع أزيد من 50 شخص، وتصاب هو وياها بفيروس "كورونا" بالإضافة لمجموعة من الأشخاص جاو حتى هوما من مكناس.
وأضاف الموظف بللي السلطات منعات عائلتو وصحابو من حضور مراسيم الدفن، أو من أنهم يشوفوه ويودعوه، وهذشي باش يتفاداو التجمهر ما أمكن، وحتى عائلتو ماتمكناتش باش أنها تدير ليه كَنازة، حيت كاينة حالة الطوارئ الصحية.
بالنسبة لحالة زوجة المتوفي الصحية، واللي حتى هي تصابت بالفيروس، كيقول بللي هي فوضعية حرجة فمستشفى سيدي سعيد، "وفالغالب ماعندها حتى شي خبار على وفاة راجلها.. الحاجة الوحيدة اللي كنتمنى هي تولي لاباس، وترجع لوليداتها بجوج"، على حساب تعبيرو.
وعلى حساب آخر الأرقام اللي عطات الوزارة، فمكناس كتعتبر هي ثاني بؤرة لانتشار فيروس "كورونا" فالمغرب، بما مجموعه 35 حالة إصابة، بعد كازا اللي فيها 58 حالات.
ولحد الساعة، تم تسجيل 275 حالة إصابة فالمغرب بالفيروس، 10 منهم توفاو.