الوزارات والمؤسسات العمومية فرقات على الموظفين ترخيص اختياري للاقتطاع من الأجور والمساهمة فصندوق "كورونا"

بدات الوزارات ومجموعة من المؤسسات العمومية التابعة ليها كتفرق على الموظفين ديالها واحد الترخيص بالاقتطاع من الراتب، باش يساهمو بيه فالصندوق الخاص بتدبير جايحة "كورونا" (كوفيد 19).
الترخيص حصلو عليه اليوم مجموعة من الموظفين، كاين اللي ترسل ليهم PDF فالجيمايل، وكاين اللي خداه مطبوع بالنسبة للناس اللي باقيين خدامين من البيرو، المؤسسات كتطلب من الموظفين ديالها باش يعبؤوه للمساهمة فهذ الصندوق.
هو ماشي ترخيص إجباري، لكن دعوة من قبل المؤسسات العمومية باش كلشي يساهم فهذ المبادرة اللي طلقها الملك محمد السادس قبل بشوية من الإعلان عن حالة الطوارئ الصحية فالبلاد، بسبب انتشار فيروس "كورونا".
الترخيص مافيهش أونطيط بحكم أنه تم توزيعو فكَاع القطاعات، كيحمل الإسم ديال الموظف ورقم بطاقتو التعريفية والإدارة اللي كيشتغل فيها، وكيحدد فيه لاصوم ديال الفلوس اللي غيتم اقتطاعها من الراتب الشهري لكل واحد قرر يساهم فالصندوق، وكيوقع ويتكَاليزا.
وجا الترخيص مكتوب على شكل التزام، كيصرح فيه الموظف بترخيصو للخزينة العامة للمملكة، وتحديدا مديرية نفقات الموظفين، باش تقتطع مبلغ مساهمتو الشخصية بواسطة أقساط شهرية من الراتب ديالو.
وكاين فالترخيص جدول كيمكن للموظف يختار فيه واش يساهم بأجرة شهر كامل، أو نص شهر، أو بأجرة عدد من أيام العمل، وواش غايتقطع ليه هذشي فشهر واحد، ولا شهرين، ولا ثلث شهور.
وللإشارة، فالملك محمد السادس كان خصص صندوق لمكافحة جايحة "كورونا"، كيمكن لجميع المواطنين يساهمو فيه من خلال رسالة SMS ببعث DON ل1919، أو عبر تحويل للحساب المفتوح رقم 001 810 00 780 002 011 062 02 21، بإسم الخازن الوزاري لوزارة الاقتصاد والمالية وإصلاح الإدارة.