الناس ولاو يخافو منها.. تراجع كبير فمبيعات بيرة “كورونا” بعد تفشي فيروس “كورونا”

أكدو تجاريين فشركة البيرة “كورونا” بللي الناس ولاو يخلطو بين الماركة دالبيرة الشهيرة والفيروس القاتل اللي انتشر بشكل كبير بمجموعة من الدول فالعالم وقتل ما يزيد عن ألفين واحد فالصين، والعشرات فمناطق مختلفة.
الماركة ديال البيرة الميكسيكية، اللي خدات سميتها من العبارة الإسبانية “كورونا”، واللي كتعني هالة الشمس الضوئية عند الكسوف، (هذ الماركة) كتعاني فهذ الأيام من واحد الانهيار حاد وانخفاض كبير فمبيعاتها، وهذشي خلا أسهم ديالها فبرصة نيويورك يهبطو بنسبة 8 فالمية.
وفسونداج ليهم، المستهلكين الميريكان اللي كانوا بنسبة 80 فالمية باللي بيرة “كورونا” مزيانة، هذ الشهر نقصات النسبة ديالهم ل50 فالمية.
وجا هذشي بحكم أن بيرة “كورونا” ولات تخلع الناس على قدر الخوف ديالهم من الفيروس اللي كيحمل نفس الإسم، واخا البيرة ما عندهاحتى علاقة بيه.
وفالمقابل، شعبية بيرة “كورونا” ارتفعات كثر، والميريكاينيين فركَعو محركات البحث بسميتها، وكتبو كذلك بشكل كبير مصطلح “بيرا الفيروس”.