رسالة من كورونا

السلام عليكم، سمح ليا مسيفط ليك هاد الرسالة على غفلة بلا سابق إنذار. أنا هو كورونا! غادي تكون تاتعرفني. ما تستغربش وما تخافش، بغيت غير نهدر معاك شوية ونوضح ليك بعض الأمور. أولا سمح ليا بزاف على الطريقة للي تعاملت معاكم بيها، درت ليكم غفل عينك طارت وقلبت ليكم حياتكم! أكيد بغيتي تفهم علاش جيت، وعلاش فهاد الوقت بالذات؟ فالحقيقة ماشي هادي أول مجية، جيت عندكم شحال هادي، ف 2002، و ف2012.
عقلتي على أنفلونزا الإبل؟ كل مرة كنت تانقول مع راسي، صافي راه تعلموا الدرس ولكن لا حياة لمن تنادي! عييت وتقهرت بطريق الخسران للي غادين فيه، عياني منظر الأرض للي عريتوها، الغابات للي حرقتوها، الأجواء للي وسختوها، المحيطات للي عفنتوها، النباتات للي سممتوها، الحيوانات للي ذبحتوها وسلختوها.. وما حبستوش هنا!..
الوحشية ديالكم فاتت الأرض والكائنات الاخرى، الهمجية ديالكم ولات بيناتكم يا حسرة، كي داير يا الإنسان مع خوك الإنسان أ مضرا؟ شعوب على قدها استعبدتوها، دول وقارات فقرتوها، من أجل مصالحكم الشخصية استعملتوها، قبايل وعشاير بالكيماوي ذوبتوها، أجيال شامخة ركعتوها، شحال من فئة مسكينة جوعتوها، وشحال من حركات حقوقية طحنتوها، الذمم ديالكم بعتوها؟ رديتو العالم غنيمة وقسمتوها!هاد الحبس للي حبستك ماشي درتو بلعاني، بغيتك تتعلم دروس، بغيتك تحس بالخوف والقهرة للي تايحس بيها المظلوم، بغيتك تحس بالجيعان والمعدوم، بالمعاق والمكلوم، بالمرة المربوطة فالدار كل يوم. نقدر نجيك قاسي، قول عليا قتال، مجرم، حقير، ولكن الذنب ديالك! كان خصني ندير شي حاجة باش تفيق، باش تحل عينيك وتشوف الحقيقة، باش توقظ من النعاس وتطفي لحريقة.
عييت ما نتفرج فيكم تاتصنعو حوايج باش تقربوا من بعضياتكم ونتوما غي تاتبعدو، عييت ما نتفرج فالأنانية، فالطمع، فالشر فالحقد فالكراهية! بغيتك تفكر ونتا فالسجن ديالي فالأشياء المهمة. داكشي للي ما كنتيش تاتسوق ليها حيت ديما مكسيري، بغيتك تفراني!، تحبس!، تاخذ نفس عميق وتفهم أن علاقاتك الإنسانية وعلاقتك مع الأرض والمحيط للي نتا عايش فيه أهم من أي شيء مادي!
تانتمنى أنك تفهم الدرس هاد المرة، تانتمنى تكون هادي آخر رسالة مني ليك! يلا ما تبدلتيش للأفضل، غا نجي نزورك مرة أخرى، و فالمرة الجاية غا نجي لابس لباس جديد، ما ينفع معاه لا ما لا صابون لا وقيد.قبل ما نختم، بغيت نبشرك أنني ما غا نطولش بزاف، خصني غير ندير الواجب مع شي وحدين راسهم قاصح، ما بغاوش يستوعبوا الدروس ديالي.تحياتي ليك، وها ودني منك!