قال مسؤول بوزارة الصحة في اتصال ل"كود"، إن "الوزارة باقي كادرس فعالية الكلوروكين ف علاج المصابين بفيروس كورونا"، مضيفا :"هاد الدراسة قريبة تخرج". وأوضح المسؤول :"دوا ديال الكلوروكين لي تيعطيو مزال قيد الدراسه و متبعين هاد البروتوكول بحالنا بحال الدول الأخرى". ولم يستبعد المتحدث أن يكون ارتفاع عدد حالات الشفاء بسبب استعمال هذا الدواء، لكن "الدراسة مزال مخرجاتش، خصوصا الناس لي تصابو كاين لي كمل 10 و15 يوم باش يبان اثر العلاج"، مؤكدا أن استعمال الكلوروكين بداه المغرب يوم 22 مارس الماضي، يعني خصنا مزال واحد 18 يوم باش نعرفو الفعالية ديالو ف الحد من الوفيات. وكشف مسؤول بوزارة الصحة ل"كود"، أن المغرب لا يعاني من مشكلة "الأسرة" لاحتضان المصابين بفيروس "كورونا". وأفاد المتحدث ل"كود" بلي القطاع الصحي العمومي فيه 22500 من الأسرة بلا ما نحسبو الطب العسكري والقطاع الخصوصي، ومكاينش عندنا فهاد الجانب تا شي مشكل". وتابع :"تا أسرة الإنعاش راه غير 13 في المائة من المصابين هوما لي كيحتاجوها، وعندنا فيها ما يكفي"، مشيرا إلى أنه بعدما شراو اسرة غايكونو وصلو ل 3000 سرير. وشدد المتحدث بلي الوضعية الخطيرة لي كان متوقعة نوصلو ليها تجاوزها المغرب، ولكن "الحذر ثم الحذر"، موضحا :"مخصناش نتساهلو وخصنا كاملين نمشيو دقة دقة بهاد المغرب لي كنشبهو ب السفينة لبر الأمان". وكشف محمد اليوبي، مدير مديرية علم الأوبئة ومكافحة الأمراض بالوزارة ديال الصحة، مساء اليوم السبت، عن تسجيل 97 إصابة مؤكدة جديدة بفيروس "كورونا" وهادشي غير فظرف 24 ساعة الماضية، ليرتفع العدد الإجمالي ديال المصابين ف بلادنا ل1545 حالة مؤكدة. وتم تسجيل 22 حالة شفاء جديدة ليرتفع العدد الإجمالي ديال الحالات اللي برات من هاد الفيروس إلى 146 حالة.
