حصيلة انتشار كورونا عبر العالم لهذ النهار: تصابو بالفيروس 2 مليون وعدد الوفيات ارتفع ففرانسا وميريكان هي اللولة

حسب موقع "وورلد ميتر" المختص فالإحصائيات، واللي كيرصد آخر مستجدات فيروس كورونا المستجد فالعالم، فات عدد المصابين بالفيروس 2 مليون شخص فالعالم كلو صباح اليوم الأربعاء 15 أبريل، فالوقت اللي تسجلات 126 حالة وفاة حول العالم، وعدد اللي تشافاو قرب لنص ميليون حالة.
وجات ميريكان هي اللولة فالعالم بعدد الإصابات، كتتبعها سبانيا والطاليان وفرنسا وألمانيا وبريطانيا والشينوا وإيران وتركيا وبلجيكا وهولندا.
ووصلات أعداد الإصابات فميريكان ل614 ألف إصابة إلى جانب نحو 26 ألف وفاة، وسبانيا سجلات 174 ألف إصابة و18 لوفاة، فالوقت اللي سجلات إيطاليا 162 ألف إصابة و21 ألف وفاة، أما الشينوا، اللي هي البؤرة اللولة ديال الفيروس، فسجلات غير 82 ألف إصابة، بالإضافة ل3 آلاف و342 حالة وفاة.
أما فرانسا فبلغ عدد المصابين عندها بالفيروس 143 ألف و303، فالوقت اللي شهدات ارتفاع كبير فأعداد الوفيات، وبلغو الوفيات عندها لحد الآن 15 ألف و729، بعدما سجلات 762 حالة وفاة جديدة.
فألمانيا، كشفات بيانات معهد روبرت كوخ للأمراض المعدية اليوم الأربعاء ارتفاع حالات الإصابة المؤكدة بفيروس كورونا ب 2486، باش يوصل العدد إلى 127 ألف و584 إصابة، وهذشي كيدل بللي كاينة زيادة فأعداد الإصابات، أما الوفيات فوصلو ل3 آلاف و254 وفاة.
ومللي بان الفيروس فدجنبر 2019 فالشينوا، تصابو 210 ديال الدول بيه لحد الآن.