تجاوزات وفيات فيروس كورونا المستجد "كوفيد 19" فميريكان اليوم الخميس، 16 لألف و246 وفاة، بعدما توفى اليوم ألف و458 بالفيروس فالبلاد، وهذ الحصيلة مرشحة للإرتفاع فهذ 24 ساعة. ميريكان يوماين على التوالي (الثلاثاء والأربعاء) سجلات أكثر من ألفين حالة وفاة فنهار وحد، وهذشي اللي خلا أعداد الوفيات بالفيروس فيها يسبقو عدد الوفيات فإسبانيا، اللي انتشر فيها الفيروس قبل من بلاد العم سام. هذ الإرتفاع اللي ماتوقعاتوش ميريكان فأعداد الوفيات خلاها ترتبك شيئا ما، وخلى رؤساء الولايات يحيرو مع الموتى ديال الفيروس. عدد الإصابات بالفيروس كذلك رتافع فميريكان، 22 و174 مصاب تسجل غير اليوم، ومزال غيرتافع من هنا ل12 دالليل، وهذشي اللي خلا الإصابات يزيدو يرتفعو ل457 ألف و101، وبهذ الأرقام كاتبقى ميريكان هي أول دولة تفشى فيها الفيروس بشكل كبير فالعالم كامل. الخوف كذلك على فرانسا اللي ارتفعو فيها حالات الوفاة فاليوم الواحد بالفيروس فهذ الأسبوع بشكل كيخلع، بحيت سجلات غير اليوم، وبحالها بحال ميريكان، ألف و341 وفاة، واللي هو أعلى معدل دالوفيات يتسجل اليوم الخميس بعد معدل الولاياتالمتحدة، وبهذشي ارتفع فيها معدل الوفيات ل12 ألف و210، وإلى مشات فرانسا بهذ الوثيرة ماغايبقى ليها والو وتفوت إسبانيا وميريكان فالوفيات. وبالنسبة لأعداد الإصابات، غير اليوم فرانسا تجاوزات جاراتها فعدد الإصابات هذ النهار، وسجلات 4 آلاف إصابة و799، باش يبلغ عدد الإصابات فالمجموع ففرانسا سقف 117 لألف و749 مصاب، وتحقق بهذشي المركز الرابع عالميا. كاين استقرار فأعداد الإصابات والوفيات اللي سجلاتهم كل من إسبانيا وإيطاليا اليوم، إسبانيا اللي كتحتل المركز الثاني فعدد الإصابات فالعالم وصلات ل152 ألف و446، والوفيات ماتو اليوما 446، وبالتالي وصلات ل15 لألف و238 فالوفيات. بالنسبة لإيطاليا اللي كتحتل المركز الثالث، بلغ عدد الإصابات اليوم عندها 143 ألف و626 إصابة، منها 18 لألف و279 حالة وفات، واللي هي أعلى حصيلة ديال الوفيات لحد الآن فشي دولة فالعالم. تركياوبريطانيا واخا انتشار الوباء عندهم ضعيف بالمقارنة مع الدول اللي سبق وذكرناها، لكنهم بجوج اليوم حققو قفزة مخيفة فأعداد الإصابات، بحيت سجلات بريطانيا 4 آلاف و344 إصابة اليوم، وفالطوطال ولات عندها 65 ألف و77 وحتلات بهذشي المركز الثامن، وتركيا سجلات 4 آلاف و56 إصابة اليوم، وفالمجموع ولاو عندها 42 ألف و282، وجات موراها مباشرة فالمركز التاسع. بالنسبة للوفيات فبريطانيا، فتسجلو اليوم 881، ووصل الطوطال ل7 آلاف و978، وفتركيا تسجلو غير 96 وفاة اليوم، والطوطال وصل ل908. وبالنسبة للشينوا، البلاد اللي بان فيها الفيروس أول مرة وانتشر فيها، فماسجلاتش بزاف دالإصابات اليوم، بحيت سجلات غير 63 إصابة (61 منها وافدة)، وبلغ عدد الإصابات فالمجموع 81 ألف و865، فالوقت اللي سجلات غير جوج وفيات، باش يوصل عدد اللي ماتو ل3 آلاف و335. أما بخصوص دول الشرق الأوسط وشمال إفريقيا، كاتجي السعودية فالمقدمة ب3 آلاف و287 إصابة و44 وفاة، موراها الإمارات بألفين و659 إصابة و12 لوفاة، ومن بعد قطر بألفين و376 إصابة و6 وفيات، ثم مصر بألف و699 إصابة و118 وفاة، ثم الجزائر بألف و666 ألف و235 وفات، واللي هو أعلى معدل وفاة فهذ الدول. ولحد الساعة، وصل عدد المصابين بفيروس كورونا فالعالم لمليون و584 ألف و982، منها 94 آلاف و720 واحد مات، و353 ألف و75 تشافاو.
