كبور قودها. كيفاش فنان ذكي بزاف اللي هو الفذ دار متعجرف. رد على مواطن: انا الفنان الوحيد حتى قناة ما كتصرف علي. بمنطقك غدا اللي جاب معلنين يدوز فالقنوات العمومية وانت عارف هاد الشي ماشي صحيح

الكوميدي حسن الفد جاوب واحد من المتتبعين ديالو لي انتاقدو وقال عليه أنه الأعمال ديالو حامضة وكتستافد من الدعم العمومي، الحاجة لي استفزاتو وخلاتو يجاوب بطريقة متعجرفة. تفتقد الذكاء اللي كيتميز بيه الفذ. اللي كتتميز بيه اعمالو الفنية. بصاج كان كبور فردو ماشي الفذ.
واحد من الجمهور كتب ليه "حسن الفذ المهرج اللي كيتفكرنا رمضان لرمضان هو فقط مثال لسوء تدبير المال العمومي حيث يتلقى ميزانيات ضخمة على حموضياته الرمضانية في حين تعاني قطاعات كثيرة كالصحة والتعليم".
الفد ردا ليه رد من 6 نقاط قال ليه باللي دوزيم ما عمرها صرفات عليه درهم واحد على اعمالو الرمضانية وان هاد القناة "كتاخد لفلوس باش دوز اعمالي" وباللي "المحتضنين الخواص اللي كيمولو اعمالو ماشي المال العام وكيخلصو دوزيم باش تدوزها وباللي بعد البث الاول دوزيم كدخل عائدات ضخمة من عائدات الاشهار وباللي المقاولات الصغرى ديالو كتساهم فالمال العام من خلال الضرائب وخلق قيمة تجارية مضافة المستفيذ منها قناة عمومية وباللي هو الممثل الوحيد اللي ما عمر شي قناة صرفات لفلوس على اعمالو".
رد متشنج. غير ذكي. جواب كيبين باللي الفذ باش كتبو ما كانش عندو الالهام اللي كيكون عندو ديما. من المفروض على فنان يدير رد ذكي. ذكاء اعمال هاد الموهوب. بان متعجرف ناكر للخير. السي حسن انت مبدع اييه ولكن بلا اعمال "الاولى" مع الراحل مصطفى المسناوي وبلا "دوزيم" مع كبور والشعيبية ما غاديش يعرفوك لمغاربة.
ثم هاديك القضية ديال كدور فالقناة وكتجيب الاشهار راها احتيال دارتو دوزيم باش تتهرب من دفتر التحملات اللي كان جابها الوزير السابق مصطفى الخلفي. راه صحاب "ماستر شاف" اللي كيقولو مولاتو اي منتجتو كيخلع كلشي دايرة هاد الطريقة. ومرفحة شركة الانتاج هادي وهاد البرنامج كيطلع بقيمة 2 مسلسلات من 30 حلقة من 30 دقيقة.
هنا راه مردود عليك. بمنطقك يا السي حسن واكيد غادي تكون انت ضدو باش تعرفو٬ ايلى خدا جا شي اماراتي او قطري مرفح وقرر يمول انتاج ويعرضو على دوزيم ويقول ليهم جبت الاشهار من شركات خليجية. الانتاج يكونو فيه شي مغاربة ولكن السيناريو يدوز ميساجات سلفية متخلفة٫ واش "دوزيم" دوزو؟ ابدا.
راه كاينين اللي عرضو على دوزيم اعمال بحال طريقتك ورفضات القناة. عرضو سهرات وعادية ورفضات. كاينة سياسة للقناة. خاص يتماشى معاها العمل.
ثم هاديك المقاولات الصغرى ديالك غير تخربيقة. حقاش انت عايش فكندا ومن حقك. يعني لفلوس كتحول ليك ومن حقك. وما تدخلش فمتاهات انت فغنى عندها.
انت فنان محترم تاخد صالير مزيان من حقك. تاخد صالير على قد الشهرة ديالك من حقك. اللي بغى يهدر ينتاقد من حقو. كنتي على الاقل تشكر القنوات. بلا "دوزيم" بلا "الاولى" ما كنتيش تكون فهاد الشهرة. اييه موهبتك واعرة وراه كاينين مواهب ما تعطاتهمش الفرصة وبقاو فالظل. انت عارف شحال من موهبة مغربية فكندا اللي ساكن فيها ففرانسا فبلجيكا فاسبانيا فالمانيا. ولكن ما تعطاتهمش الفرصة.
كنتي كبور فردك ماشي الفذ. نقصاتك النباهة. غلب عليك التسرع. كنتي منرفز متوتر. يمكن عندها علاقة ببث العمل الجديد ديالك "طوندونس" اللي دايز الليلة فدوزيم. يمكن استبقتي المقارنات والانتقادات من الجمهور.