نضامنو ضد كورونا بالزطلة والشراب والملوي.. المغاربة استقبلو الإيموجي الجديد فالفايسبوك بالساركازم

الفيسبوكيون المغاربة استقبلو الإيموجي الجديد دالرياكسيون على المنشورات فالموقع الأزرق بالضحك والساركازم، من بعد ما لونصاتو شركة فيسبوك هاد الأيام باش تسمح لمستعملي الفضاء يتضامنو مع بعضهم فهاد الفترة ديال جايحة كورونا.
بزاف منهم موديفياو تصويرة الإيموجي اللي هاز قلب فيديه، وبدلو القلب بالحشيش والشراب والكَارو، والملاوي، وبزاف فالتعليقات أكدو بللي هادشي هو اللي يقد يخلي الإنسان صابر فهاد الحجر الصحي، فالوقت اللي قالو فيه وحدين خرين بللي توحشو هادشي بزاف بسباب رمضان، حيت تحرمو منو.
من جهة أخرى، نشطاء تساءلو علاش مازال ما زودهم مارك زوكَربيركَ بالرياكسيون الجديدة (care- solidaire)، وخصوصا الناس اللي عندهم فيرسيون قديمة ديال فيسبوك..
وحدين خرين دارو ميم فيه صلاح الدين العماري، اللي ولاو شادين فيه بزاف هاد الأيام بسبب طريقتو الغريبة فتقديم برنامج أسئلة كورونا فدوزيم، كيقول فيه بللي فايسبوك كيعطي هاد الإيموجي الجديد للناس واحد بواحد لتفادي الاكتظاظ فزمان كورونا وماتخافو ماتدهشو راه غنسيفطوه ليكم حتى لعندكم".