الأوبئة: الاجراءات الاحترازية اللي دار المغرب مكناتو من تجنب إصابة حتى ل500 ألف شخص بكورونا ونقذات 15 ألف واحد من الموت.. ومؤشر انتشار الوباء كينقص نهار على نهار.. وهاذي الجهات اللي قدرات تتغلب عليه فخطرة

علنات مديرية علم الأوبئة ومحاربة الأمراض بللي المغرب متحكم فالوضع الوبائي لفيروس كورونا المستجد، وبللي الإجراءات ديال الحجر الصحي اللي اتخذها فإطار حالة الطوارئ الصحية ساهمات بشكل كبير من تقليص عدد الإصابات والحد من انتشار الفيروس بين الناس.
وكتقول مديرية الأوبئة بالأرقام، فخارطة طريق دارتها تمهيدا لرفع الحجر الصحي فالمغرب، بللي الإجراءات اللي اتخذها المغرب مكنات من تجنب إصابة بين 300 ألف حتى ل500 ألف إصابة جديدة بكورونا، ونقدات من 9000 حتى ل15 ألف واحد من الموت بالفيروس، وكان من الممكن يحتاجو 4650 حتى ل7750 واحد لقسم الإنعاش وتكون حالتهم خطيرة بزاف كون ما تدارتش هاد الإجراءات.
وحسب المديرية، فانتشار فيروس كورونا المستجد اللي كيأدي لمرض "كوفيد 19" بدا كينخفض، والمنحنى ديالو غادي وكيتسطح، من بعد ما دازو 4 ديال الموجات اللي ارتفعات فيها أعداد الإصابات بشكل كبير، ف5 أبريل، ف17 أبريل (فاش تسجلات أعلى نسبة دالإصابات)، وف21 أبريل و ففاتح ماي، وهاد الموجات الحدة ديالهم غادية وكتنقص.
أما بالنسبة للرصد الوبائي الأسبوعي، علنات المديرية بللي عدد الإصابات بفيروس كورونا اللي كتسجل كل اسبوع عرف واحد الانخفاض، وبللي السيمانة اللي سجلات اكبر عدد ديال الإصاباتي هي من 13 حتى ل19 أبريل.
وحتى مؤشر الوفيات بالمقارنة مع حالات الشفاء طاح بزاف، بحيت نزل عدد الوفيات ل3 فالمية، فالوقت اللي تجاوز عدد حالات الشفاء 35 فالمية، وهذشي عكس اللي كان قبل فالأسابيع الأولى من ظهور الفيروس فالمغرب، بحيث فاتت نسبة الوفيات 12 مارس 17 فالمية، فالوقت اللي ماكانتش كتجاوز نسبة الشفاء 1 فالمية.
أما بالنسبة لمؤشر انتقال عدوى الفيروس R0، فتحدد على المستوى الوطني ف1,01، وعلى المستوى الجهوي جهة كازا عندها أعلى مؤشر واللي هو 1,09، تابعاها مراكش ب1,07، وطنجة ب1,06، وفاس ب1,04، والرباط 0,98، بينما جهات بني ملال ودرعة وسوس ماسة وكلميم فمؤشر الإصابات عندهم قل من 0,5، بينما الجهات الأخرى اللي بقات، واللي هي جهة الداخلة والعيون والجهة الشرقية، فالتطور الوبائي فيهم حبس فخطرة.