الوضع خرج على السيطرة فالطاليان.. تسجلات 368 وفاة بسباب كورونا ف24 ساعة

اليوم الأحد، وصلات الطاليان لأعلى نسبة ديال الوفيات فاليوم الواحد بسبب فيروس “كورونا” المستجد، 368 واحد مات اليوم فيها وفظرف 24 ساعة فقط، وبالتالي ارتفع عدد الوفيات اليوم ل1809.
وحتى عدد الإصابات اللي تسجلات اليوم ب”كورونا” ارتفعات بزاف، 3 آلاف و590 حالة جديدة غير اليوم، وهكذا وصل عدد الحالات فالطوطال ديال المصابين بالفيروس ل24 ألف و747 حالة، فالوقت اللي كان غير 21 ألف و157 حالة لبارح.
هذ الأرقام كتخلع، لكنها أرقام رسمية وموثوقة، علنات عليها الوقاية المدنية الإيطالية اليوم، السبيطارات عمرو على الجهد، والأغلبية ولاو يديرو الحجر الصحي غير فالدار، والوضع بالصح خرج على السيطرة فالطاليان.
لحد الساعة لومبارديا هي الجهة اللي تقاست كثر، ماتو فيها ألف و218، و فيها 13 لالف و272 إصابة دابا، فهذ الجهة الإجراءات ديال حظر التجوال والتزام المنازل متشددة بزاف، وهذ الإجراء، حسب الوزير اللول الطالياني، كَوزيبي كونتي، يقدر يدير المفعول ديالو من دابا جوج سيمانات.
لكن وخا هكذاك، عبر رئيس الوزراء فمناسبات كثيرة على الحيرة ديالو من بعد انتشار الوباء، والقلق ديالو من الطاقة الاستعابية ديال المستشفيات فالطاليان واللي غادة وكتضعاف.