علنات وزارة الصحة، فتقرير ليها بخصوص الحالة الوبائية المرحلية لفيروس كورونا المستجد فالبلاد، من 2 مارس حتى ل12 أبريل، عدد المصابين اللي كيتلقاو العلاج ديالهم فالإنعاش انخفض فالأيام الأخيرة، ففالوقت اللي كان العدد ديالهم هو 105 فأبريل 2020، وهنا كانت الذروة، وبدا هذ العدد كيتراجع نسبيا كل يوم، حتى ولاو عدد الناس اللي فالإنعاش ف13 أبريل 78 شخص. وبالنسبة للحالات المشكوك فيها واللي خضعات للحجر الصحي من بعد ما تبين أنها تخالطات مع حالات مصابة، فكيقول التقريرالمبياني والإحصائي، اللي صدراتو الوزارة اليوم الأربعاء، بللي 9984 مازال كيتم التتبع ديالهم، فالوقت اللي 5384 سالاو التتبع. وبخصوص توزيع الإصابات حسب الجهات، كيقول التقرير بللي لحد 12 أبريل 12 لجهة تقاسو بالفيروس و57 عمالة وإقليم، وقال بللي الجهة اللي فيها أكبر عدد ديال الإصابات هي جهة كازا سطات ب484 إصابة، موراها مراكشآسفي ب314، موراها الرباطسلاالقنيطرة ب 237، موراها فاسمكناس ب215. وحسب تقرير الوزارة دائما، واخا جهة كازا سطات كتحتل المركز الأول، وكانت هي أول جهة تقاصت بالفيروس، المؤشر التراكمي للفيروس فجهة مراكشآسفي مرتفع، بحيت كيساوي 6,53، وهذا كايعني أنها اكثر جهة مهددة بانتشار الفيروس أكثر، بينما كازا سطات 6,49، فاسمكناس 4,88، والرباطسلاالقنيطرة 4,85. بالنسبة لتوزيع المصابين حسب الجنس، فكيقول التقرير بللي 53 فالمية من المصابين ذكور، و47 منهم إناث، اما على مستوى التوزيع حسب العمر، فأعلى نسبة ديال المصابين هي ديال الناس بين 41 عام و64 عام، بنسبة 35,85 فالمية، فالوقت اللي بلغات النسبة الأدنى ديال المصابين 1,15 فالمية. وباش ما يزيدش ينتشر الفيروس أكثر، نصح التقرير بتعزيز الحجر الصحي على المدن اللي مقيوسة بالزاف بيه، ويتم الاستمرار فوضع المخالطين بالحالات الأكيدة فالحجر الصحي. من جهة أخرى طمنات الوزارة الرأي العام، وقالب بللي ابتداء من 27 مارس، السرعة ديال انتشار الفيروس بدات كتنقص شوية بشوية، فالوقت اللي كان مؤشر سرعة التفشي هو 2 قبل 27 مارس، ف12 أبريل ولا 1,21. واستحسن التقرير القرارات اللي تخادت قبل ما يطلع عدد الإصابات بالفيروس، من وقف الرحلات وإلغاء الدراسة وصولا لفرض حالة الطوارئ الصحية، وقال بللي لهذ الإجراءات فضل كبير باش الامور تكون تحت السيطرة.
