كلنا ولينا عارفين أن في المغرب أي رجل أمن أو سلطة خرق القانون مع شي حد وتم توثيق ذلك راه كيتعاقب بعقوبات كثر من لي تعاقبو بيها البوليس ديال لوس أنجلس لي تكرفصو على رودني كينك وناضت ثورة من بعد وتحرقات المدينة

فيديو ديال جوج مخازنية كيصرفقوا شاب وطلعوه للسطافيط، المغاربة في الغالب كيكون عندهم جوج مواقف لا غير، الموقف اللول ولي هو فالغالب ديال شي مواطن(ة) عاقل وكادح كيعرق على الريال ولكن الوقت باقي مخلياه حاصل فحي شعبي أو هامشي عامر بالشباب والمراهقين قلال الترابي والعفة، لي خاصك تحضي راسك منهم ليسرقوك والى شرب شي واحد فيهم يفيق كاع الدرب والوقيتة لي تبغي نتا تنعس عاد يعصرو هوما فالدرب ويبداو على الجوانات والوش، في حالة المراة المعاناة كتضاعف، الى كنتي ساكن فراس الدرب فين كيعصرو، راه عمرك تشوف النعاس والى قدرتي تجري عليهم غادي تسمى كنيمة، وإلى عيطتي ليهم للمخزن غادي تسمى بياع، وحتى لي ماساكنش حداهم راه كيعاني منهم غير شي شرات ليه مو شي سي تسعين كيعطيها للخطيف والتزنزيط فالشوارع، والى كانت عندو شي ختو مدورة الحركة كتدير هاه وهاه، راه كتاخد ليه إس آش ألف ربعين، وأراك داك الساعة للطيران، نهار كيبان فيهم شي واحد شادو المخزن وكيشبع فيه عصى كيقولوا سرو وهادشي لي صالح معاهم راه سابو وخاص المخزن يربيهم.
الرأي التاني طبعا هو فيناهي حقوق الإنسان ممنحقوش يضربو ممنحقوش يهدر معاه بديك الطريقة، هاد الرأي في الغالب بعدا وخصوصا في فايسبوك كتلقاه جاي من عند مغاربة الخارج، بنادم كيهاجر البلاد باش يقلب على حياة حسن ليه ولولادو، وغير كيوصل تم كيولي الشغل الشاغل ديالو يوميا هو المغرب وحقوق الإنسان والدولة ومحاربة الفساد، وهادو في الغالب الناس لي دازت من لافاك والهجرة المتعلمة، ماشي طبعا الأدمغة حيت مكيهدروش فالسياسة هادوك وملي كيساهمو بشي حاجة فراه كتكون داخلة في التخصص ديالهم وفقط، أما لي غير تعلم يقرى ويكتب وبقا غادي حتى وصل شد شي ديبلوم، وفالغالب معندو حتى شي مهارة محددة في الحياة أو تخصص، هو لي كتلقاه عزيز على المواضيع العامة بحال السياسة وحقوق الإنسان والنضال، وهادو وهوما لي فارعين لينا راسنا بواك واك أعباد الله فيناهي حقوق الإنسان.
كلنا ولينا عارفين أن في المغرب أي رجل أمن أو سلطة خرق القانون مع شي حد وتم توثيق ذلك راه كيتعاقب بعقوبات كثر من لي تعاقبو بيها البوليس ديال لوس أنجلس لي تكرفصو على رودني كينك وناضت ثورة من بعد وتحرقات المدينة، ومع ذلك كاينين مغاربة باقين سامرين على المخزن خاصهم ضروري يشوفوه بصورتو القديمة، هاد التطور ديال المخزن ماواكبوهش هوما وبقاو بلاصتهم عاطيينها للبكى، وفي بزاف ديال المرات التعاطي ديالهم والتفاعل مع فيديوات فيها اعتدائات مفترضة ديال المخزن على المواطنين، كتلقى الهدف منها التشويه كثر من انه فضح لخرق حقوقي والمطالبة بالتحقيق، كولشي عارف دابا أن أي فيديو كيتحط فالمواقع الإجتماعية كيتم البحث والتقصي عليه وكتبان حقيقتو من بعد ساعات، ولحد الآن الأمور غادا مزيان طبعا كاين تجاوزات ولكن كتبقى فردية ومستهدف بيها عينة المغرب كامل متافق على أنها تستاهل لعصا، وطبعا حيت هادشي ضد حقوق الإنسان فراه المغرب كامل باغينهم يغرقو حبس.