كتنافسها فعراسات الخليج.. رجاء بلمير كانت الضحية المقبلة ديال دنيا باطمة فحسابات "حمزة مون بيبي"

من بعدما تغيبات على جلسة محاكمتها الأولى، كشفت مصادر قريبة من ملف "حمزة مون بيبي" لي متابعة فيه المغنية دنيا باطمة في حالة سراح، أن الخبرة التقنية لي تدارت على الهاتف ديالها كشفت على أسماء مشهورين آخرين لي كانو غادي يكونو ضحايا حساب التشهير.
ومن بين الأسماء لي كانت غادي تكون ضحية "حمزة مون بيبي"، المغنية رجاء بلمير والأخ ديالها عمر بلمير لي كانو أيضا غادي يتعرضو للتشهير لولا أن القضية وقفات في فترة معينة.
وحسب المعلومات لي توصلات بيها "كود"، رجاء بلمير كانت حتى هي غادي تتعرض للتشهير عبر الحساب والسبب يقدر يكون حيت بدات كتنافس دنيا في أعراس الخليج، وبطريقة ذكية لأنها كتطلع على المتعهدين بأجر أقل مقارنة مع باطمة وفي نفس الوقت سمعتها نقية وبعيدة على الصداع.
أيضا، اعترفت ابتسام ان ختها دنيا كانت كتطلب من المعجبين والمتتبعين ديالها يهاجمو بزاف ديال الفنانين والمشاهير فقط لأنهم دخلو معاها في صراع، منهم سعيدة شرف.
ودنيا وختها متابعات بجنح كتتعلق بالمشاركة في الدخول إلى نظام المعالجة الآلية للمعطيات عن طريق الاحتيال، والمشاركة عمدا في عرقلة سير هذا النظام وإحداث اضطراب فيه وتغيير طريقة معالجته، وبث وتوزيع عن طريق الأنظمة المعلوماتية أقوال أشخاص وصورهم دون موافقتهم، وبث وقائع كاذبة قصد المساس بالحياة الخاصة للأشخاص قصد التشهير بهم والمشاركة في ذلك والتهديد.