فيسبوك تدعشش هاد الأيام. من بعد الهجوم على مينة بوشكيوة.. المتخلفين شبعو سبان فرفيق بوبكر بسبب فيديو كيهدر فيه على الشراب

فيسبوك ولا عامر هذ الأيام بالدواعش اللي كيسميو راسهم ب"حماة الدين"، واللي عزيز عليهم يخرجو يسبو فالناس ويقمعو حريتهم فالتعبير باسم الدين، من بعد مينة بوشكيوة اللي ماخلاولهاش بسبب سطاتي عادي تكلمات فيه على غزوات الرسول الجنسية الموثقة فكَاع كتب السنة، الدور جا على رفيق بوبكر اللي شبعو فيه سبان حتى هو، بسباب فيديو قال فيه بللي ماشي مشكل الإنسان يصلي واخا يكون سكران.
خوتنا فالله اعتبرو بوبكر كيستهزأ بالإسلام والصلا، وطالبو النيابة العامة باش تتدخل بشكل عاجل وتفتح تحقيق فالموضوع، خصوصا وأنه قال فالفيديو بللي هو وصحابو كَالسين كيسكرو فجامع.
مجموعة من المعلقين شافو بللي حملات السب والشتم اللي تعرض ليها الممثل المغربي ماعندها حتى مبرر، خصوصا وأن السيد ضاحك وناشط مع صحابو، وعندو كامل الحرية باش يعبر كيف بغا وما آذا بكلامو حد.
واحد من المعلقين الكثار انتقد "دخول الصحة ديال شي ناس فحياة الناس لخرين"، وواحد آخر علق كيتساءل، متقدا الدعوة لفتح تحقيق فهذشي ففيديو بوبكر: "اشنو المشكل فهذشي؟ واقیلا حتی عثمان بن عفان کان خاص یتفتح تحقیق بشأن ذهابو للمسجد و هو سکران، وحتی ربی نزل آیة موجهة لیه خصیصا و قالو لاتقربو الصلاة و انتم سکاری".
وقال معلق آخر، ردا على الهجمة على بوبكر بسبب الفيديو: "الانتقاد يكون في إطار عمله كفنان أما الخرجات فلكل هفواته ولكل قناعته وكل حر في ما يعبر عنه.. غير من خلال التعليقات استغرب مدى حجم ردود الفعل المستعدة لردم وإقبار المخطئ وكأن الخطأ استثناء الاستثناءات والطهرانية هي القاعدة".