واش كان الممثل هشام سليم يتقبل فكرة تحول ولدو لبنت ويصرح بيها فالتلفزة.. المشكل فمجتمعاتنا المتخلفة كاين مع الأنوثة وماشي الذكورة.. وخاص الاعتراف بجميع المتحولين والمثليين حيت ميولاتهم طبيعية وماعندهم حتى دخل فاختيارها

الممثل المصري هشام سليم مالقى حتى حرج فأنه يعترف قدام الملايين فبرنامج "شيخ الحارة والجريئة" فقناة القاهرة والناس، بللي بنتو نورا تحولات جنسيا ورجع اسمها نور، واعتبر قرارها شجاع منين صرحات ليه بهذشي، وقال بللي كيخص جميع الآباء يتقبلو هذ الأمر ويفهمو بللي الأبناء إلى كانو كيعيشو فجسد من غير الجسد ديالهم، وميولاتهم وهويتهم الجندرية ماكتوافقش مع الجسد ديالهم، فراه ماعندهوم فيه حتى شي ذنب فهذشي.
نفترضو أن الأمر كان كيتعلق بولدو ماشي بنتو، وهذ الولد قرر يتحول من ذكر لأنثى، واش كان يرضى سليم يقولها فالتلفازة بنفس الجرأة؟ واش كان يرضى يقول للناس بللي ولدو رجع "لوبيا" (كيف كيسميوها هنا عندنا فالمغرب) ودار عمليات التحول الجنسي والهرموني ورجع يلبس بحال لبنات ويتصرف بحال لبنات؟ لا بل واش كان أصلا يتقبل الأمر فاللول كيف تقبل تحول البنت لدري؟ موحال..
وحتى الدواعش اللي مولفين يخرجو فكل مرة يسبو على أي حاجة جاتهم "ماهياش" وكتهدد نظامهم الإرهابي اللي كيقوم على كراهية المختلفين، هذ المرة مع هشام سليم ضربو الطم، بل كاين اللي اعتبر الأمر عادي جدا، وحتى حد ما وصف الأب لا بالديوثي ولا بالأوصاف الأخرى الكثيرة كيطلقوها هذ الأنواع بالنسبة لأي واحد كيتقبل الاختلاف وكيعترف بالحريات وكيرفض يتحكم فأفراد عائلتو بأي شكل من الأشكال، واخا والأصل راه هذشي اللي خصو يكون.
إذن المشكل ماعندناش مع الذكورة، المشكل عندنا مع الأنوثة اللي خاصها تتحارب فهذ المجتمعات الذكورية، أما البنات اللي تحولو لدراري فكان ختيارهم مناسب لأن الأنثى "عار" و"عورة" و"ناقصة عقل ودين" و"كتقطع الصلا بحال الحمار والكلب لكحل"، لكن إلى تحولات هذ الكائنة اللي كيعتبروها "نصف إنسان" إلى ذكر، فلا حرج عليها.
بزاف دالبنات كيلبسو بحال الدراري وكيتصرفو بحالهم، منهم متحولات وغير متحولات، عمر شي واحد ما عيب عليهم ولو بنص كلمة، بالعكس المرا المرجلة كتعجبهم وكيرتاحو ليها أكثر، أما المتحول للمرا اللي كيلبس بحال النساء أو كيتصرف بحالهم، فيقدرو يقتلوه ماشي غير يضربوه، وخير مثال هذشي اللي وقع مؤخرا مع المثليين فتطبيقاتهم، والكم الهائل ديال التجريح والسبان اللي خداو، وعاد تنشرو تصاورهم وهذشي خلق ليهم مشاكل مع عائلاتهم، وشحال من واحد تشرد، وكاين اللي انتحر كَاع.
ماخصش الكيل بمكيالين فهذشي ديال الحريات الفردية على هوانا، راه ماشي المرا حلال عليها تحول للراجل والراجل لا، ماشي حلال على الراجل يمارس الجنس حيت "راجل" والمرا اللا، ماشي نتقبلو المرا تاكل حدانا فرمضان حيت هي حائض ولا الظري الصغير ونرفضو يديرو هذشي حدانا غير المسلمين.
المرا من حقها تولي راجل إلى ماكانتش كترتاح فالجنس البيولوجي ديالها، ومن حق الراجل يولي مرا إلى مارتاحش فجسدو، ومنحقهم يلبسو اللي بغاو ويتصرفو كيف بغاو، كيف من حق ثنائي الميول والمثليين يعيشو حياتهم بلا قيود وبحرية واستقلالية، نكونو شوية إنسانيين وديمقراطيين ونحتارمو أقليات مجتمع "الميم"، حيت هذ الناس مادارو حتى شي ذنب فحياتهم، فقط بغاو يعيشو بحال الناس وبميولاتهم الطبيعية اللي أصلا ماعندهم حتى شي يد فاختيارها.
ونتمناو شي نهار الدواعش يفهمو شوية بللي المرا بحالها بحال الراجل، وتحول راجل لمرا ماكاينقصش من قيمتو كإنسان، المثلين والمتحوليين بحالهم بحال المغايرين وغير المتحولين، وهذشي حيت جميع المواثيق والمنظمات الدولية ديال حقوق الإنسان كتنص على أن كَاع الناس متساوون كيف ما كانت اختلافاتهم، وكتنبذ هذ المظاهر ديال التمييز والكراهية اللي مازال معششة فدماغ الكثيرين فالمجتمعات النامية.