بعد مقال "كود" على مجرمين كيروجو للبيدوفيليا ف"فيسبوك".. جوج أشخاص سافطو محتويات إباحية لأطفال قاصرين جابو الربحة

عرفات "كود" من مصدر أمني بللي البوليس قرقبو على جوج أشخاص، واحد فالجديدة ولاخر ففاس، كيسيفطو لدراري صغار وقاصرين محتويات إباحية فموقع التواصل الاجتماعي "فيسبوك".
وحسب المصدر نفسود فالمصلحة الولائية للشرطة القضائية فالرباط فتحات بحث معمق، تحت إشراف النيابة العامة المتخصصة، فهذ الموضوع، وتم توقيف هذ الأشخاص ووضعهم تحت تدابير الحراسة النظرية، قبل ما يتم تقديمهم لوكيل الملك.
وللإشارة، مجموعة من النشطاء على موقع التواصل الاجتماعي "فيسبوك" استغربو من ترويج مضامين إلكترونية بيدوفيلية، ووجود مجموعات وباجات مغربية كتحط صور وفيديوهات ديال جرائم اغتصاب قاصرين والاعتداء عليهم جنسيا، وصور أخرى لأطفال بتعليقات فيها إيحاءات جنسية ومرضية.
من ضمن هذ النشطاء مهندس الأنظمة المعلوماتية مروان المحرزي علوي، اللي عبر على استنكارو للترويج للبيدوفيليا بشكل عادي، بلا ما تتدخل إدارة الفيسبوك باش تمنع هذشي، وبلا ما تحرك النيابة العامة متابعات ضد هذو اللي كينشرو بحال هذ الصور والفيديوات "الخطيرة".
المحرزي ونشطاء خرين قادو ليست ديال عشرات الحسابات المشبوهة اللي كتروج هذ المضامين، فانتظار تتفاعل معاها السلطات وتدير اللازم.