الحصيلة الوبائية لكورونا فهاد 24 ساعة: 71 تصابو و76 تشافو وحتى واحد ما مات.. الطوطال: 7714 حالة و202 متوفي و5271 متعافي.. وكازا اللي سجلات اكبر عدد من الاصابات

علنات وزارة الصحة على تسجيل 71 إصابة جديدة بفيروس كورونا المستجد فهذ 24 ساعة الأخيرة، أي من الستة دلعشية لبارح الخميس حتى للستة دالعشية اليوم الجمعة، وهكذا وصل عدد المصابين فالمجموع ل7714.
وقال مسؤول فوزارة الصحة، فالندوة اليومية للترصد الوبائي لفيروس كورونا المستجد، أنه تسجلات 76 حالة شفاء اليوم، ووصل المجموع ل5271 حالة، أي بنسبة تعافي وصلات ل68,3 فالمية.
واليوم ما تسجلات حتى وفاة جديدة، واستقر المجموع ف202، أي نسبة الإماتة استقرات ف2,6 فالمية.
وفهذ 24 ساعة جهة كازا سجلات 49 إصابة، موراها طنجة تطوان الحسيمة ب13 إصابة، ثم جهة مراكش آسفي ب6 إصابات، وجهة الرباط سلا ب2 حالات، والجهة الشرقية بحالة وحدة، بينما ماسجلات الجهات الأخرى حتى إصابة.
من هذ 71 حالة اللي تسجلو اليوم، تم اكتشاف 76 عن طريق عملية تتبع المخالطين، ووصل عدد المخالطين اللي تم التتبع ديالهم منذ ظهور الوباء ل43172، ودابا مازالين 6322 رهن التتبع.
وأكد مسؤول وزارة الصحة، فالندوة دائما، أن الحالات النشيطة بلغ عددها 2241، وأن نسبة المصابين الذكور بلغات 59 فالمية، والنساء 41، بينما متوسط العمر ديال المصابين تحدد ف35 عام.
وبالنسبة للوضعية الصحية ديال الحالات النشيطة، ف1,4 فالمية منهم فحالة حرجة، و7 فالمية عندهم أعراض متوسطة و91,6 باعراض طفيفة او بدون أعراض.
والوزارة استبعدات فالمجموع 182347 حالة إصابة بالفيروس، بعد ما خرجات تحاليلهم سلبية.
وهذا التوزيع ديال الإصابات حسب الجهات بالنسبة المئوية: