واش الكيران غيرجعو يخدمو غدا؟. مسؤول فشركة: هذشي ماكاينش.. وشيفور: ما وصلنا والو والمحطات راهم سادين

مصادر إعلامية متطابقة تداولات خبر استئناف عمل الكيران فالمحطات ابتداء من غدا الخميس، باش يوليو ينقلو المسافرين بين المدن بالنسبة للناس اللي كيتعتبر التنقل ديالهم ضروري، فهذ الفترة ديال الحجر الصحي اللي فرضها فيروس كورونا المستجد.
فاتصال "كود" مع ياسين حافة، المسؤول التجاري المكلف باللوجيستيك فشركة "مركوب" دالكيران، قال بللي مازال ما غيستأنفو الخدمة ديالهم دابا حيت السلطات ماعطاتهم حتى شي تعليمات لحد الساعة.
وأكد المسؤول بللي حتى شي حد ما علمهم باستئناف العمل من جديد، واعتبر بللي هذ الهضرة، اللي راجت بزاف فهذ الأيام الأخيرة، لا أساس لها من الصحة.
عزيز، واللي هو واحد من الشيافرية اللي خدامين فمحطة القامرة، حتى هو أكد نفس الكلام فتواصلو مع "كود": "ما علمونا بحتى حاجة لحد الساعة، ومازالين بحالنا بحال الناس كنتسناو، وماحطات الكيران راه مسدودين حتى لإشعار آخر".
وغير قبل بأسبوع، تم تداول أخبار مفادها بللي الكيران غيرجعو يخدمو ابتداء من 27 ماي، لكن تبين أن هذشي ماشي صحيح.
وفخضم هذ الفترة ديال الطوارئ الصحية، كانت السلطات علمات شركات الكيران باش تبقى على أهبة الاستعداد لتنقيل الناس اللي كيشتغلو فالصفوف الأمامية فهذ الوباء، من أطباء وممرضين وبوليس وعسكر، وهذشي إلى دعات الضرورة فقط.