الحصيلة الوبائية لفيروس كورونا فهاد 24 ساعة: 82 تصابو و78 تشافاو وحتى واحد ما مات.. الطوطال: 8692 مصاب و7696 متعافي و212 متوفي .. و784 كيتعالجو

علنات وزارة الصحة على تسجيل 82 إصابة بفيروس كورونا المستجد فهذ 24 ساعة الأخيرة، وهكذا وصل عدد المصابين فالمجموع ل8692، بمعدل 24 لكل 100 ألف نسمة.
وكشف معاذ المرابط، منسق المركز الوطني لعمليات الطوارئ العامة بوزارة الصحة، فالندوة اليومية للترصد الوبائي لفيروس كورونا المستجد، أن هذ الحالات تسجلات أغلبها فطنجة (59)، بينما سجلات مراكش آسفي 11 حالة، وكازا سطات 10، والرباط سلا والجهة الشرقية حالة وحدة فكل وحدة.
الإصابات اللي تسجلات اليوم تكتشفات منها 80 عن طريق تتبع المخالطين، وهكذا وصل مجموعهم ل49789، و5840 مازالين تحت المراقبة.
وتسجلات 78 حالة شفاء اليوم، ووصل المجموع ل7696، بنسبة تعافي ديال 88,5 فالمية.
وما تسجلات حتى وفاة، وهكذا بقا الطوطال مستقر ف212، بنسبة إماتة ديال 2,4 فالمية.
والحالات النشيطة بلغ عددها اليوم 784 حالة، بمعدل 2,2 لكل 100 ألف نسمة، بينما ولات 3 جهات خالية من الفيروس، وهي جهة العيون الساقية الحمرا، وجهة الداخلة واد الذهب، وجهة درعة تافيلالت.
واليوم تستبعدات 16674 حالة إصابة، ووصل المجموع ل397206 حالة خرجات تحاليلهم سلبية.
وبالنسبة للي كاينين فالإنعاش فعددهم 12، 4 منهم تحت التنفس الاصطناعي، وأغلبيتهم كاينين فكازا سطات (8)، و4 حالات بجهة فطنجة تطوان.
ومعدل السن عند الحالات النشيطة تحدد ف33 سنة، 58 فالمية منهم ذكور، بينما الأطفال أقل من 14 سنة كيبلغ عددهم 114.
وهذا التوزيع الجغرافي للإصابات بالنسبة المئوية: