مشكلة خرا ما محتاجينهاش. عمر الراضي واستيتو تشدو.. تاهمو مصور "شوف تيفي" بملاحقتهم وبتواطؤ البوليس معاهم.. والمتهم: ضربوني وها التفاصيل الخايبة فهاد القضية

البارح تشد الصحافي عمر الراضي مع صاحبو وزميلو عماد ستيتو. كان الاخد والرد فهاد لافير الغريبة. الراضي مازال كيحققو معاه على قضية اخرى. الحكومة فخرق لسرية التحقيق دارت بيان كتاهمو بالتخابر كاع. هاد الشي كولو جا بعد نشر صحف عالمية لتقرير امنستي يتهم جهات باختراق هاتف الصحافي. المهم مخربقة بزاف. قضية البارح اللي ظاهريا ما عندها علاقة بهاد الشي غادية تزيد تمشكلها.
البوليس شدهم ودابا عندهم تهمة هي السكر العلني والعنف. السكر العلني تهمة تافهة فبلاد التناقضات. العنف نشوفو كيفاش.
وحسب رواية مصدر ل"كود"، فإن الإيقاف جاء على خلفية الاشتباه فتعرضهما لمصور «شوف تي في»، قدام مراتو وولدهم، ومتهمين باللي ضربوه.
لكن الراضي واستيتو قدمو رواية اخرى فتسجيلات نشراتها "لوديسك". قالو باللي دخلو فشد لي نقطع ليك مع مصور "شوف. تي. في" حقاش شافوه تابعهم وكيصورهم فين ما مشاو. فواحد التسجيل نشراتو نفس الجريدة قال عمر وهو كيهدر مع بوليسي "حنا دابا غاديين للكوميسارية لأن شوف تي في تابعانا النهار كامل وباغة تصورنا خارجين من شي بلاصة.. هادشي ماشي معقول.. وانتوما كنتو فالدورة، 20 ثانية وانتوما تجيو، يعني متافقين مع "شوف. تي. في".
هاد التسجيل اللي بغى الراضي يحمي بيه راسو يقدر يكون سبب يغرقو. دابا مصدر قال ل"كود" باللي النيابة العامة يمكن ليها طبق المادة 1447 من القانون الجنائي، والتي تنص على أنه "يعاقب بالحبس وغرامة مالية كل من قام عمدا، وبأي وسيلة بما في ذلك الأنظمة المعلوماتية، بالتقاط أو تسجيل أو بث أو توزيع أقوال أو معلومات صادرة بشكل خاص أو سري، دون موافقة أصحابها. كما يعاقب بنفس العقوبة، من قام عمدا وبأي وسيلة، بتثبيت أو تسجيل أو بث أو توزيع صورة شخص أثناء تواجده في مكان خاص، دون موافقته".
ياك قلنا ليكم راها مخربقة. باللي هادي حلقة من مسلسل كان بدا باعتقال الراضي بعد نشرو لتدوينة ضد القاضي اللي حكم على زعماء حراك الريف، وداز لامنستي ودابا التخابر والجديد هو اللي وقع البارح بالليل.