الوزارة للمغاربة اللي مسافرين لبلدان فيهم تيست كورونا ضروري: هافين تقدرو ديرو التحليل وهابشحال

حددات وزارة الصحة ثمن التيست ديال فيروس كورونا المستجد، بالنسبة للناس اللي بغاو يسافرو للدول اللي فارضة التيست PCR، ف500 درهم كثمن فيكس.
دورية جديدة ديال الوزارة، موجهة للمدراء الجهويين للصحة، ومدير المعهد الوطني للصحة ومدير معهد باستور، باش يبداو يديرو ليتست للناس اللي غيمشيو برا، سواء كانو مغاربة أو أجانب عايشين فالمغرب.
وقالت الوزارة، فالدورية ديالها اللي حصلات عليها "كود"، أن المديريات الجهوية للصحة والمعاهد بجوج كيعتمدو اختبار مرجعي جزيئي ومعروف بالدقة ديالو واللي هو qRT-PCR واللي أساسي من أجل السفر.
وبالنسبة للي عوالين يديرو التيست باش يسافرو، خاصهم يمشيو لأقرب مؤسسة صحية ليهم فمحل السكنى ديالهم، ويجيبو معاهم فوطوكوبي ديال لاكارط ناسيونال والبيي ديال السفر.