كيفاش قوالب إحصاءات مديرية جهة الرباط.. نقصات عدد الإصابات بكورونا من العاصمة وعلنات على 11 لإصابة جديدة فالجهة فالوقت اللي عدد الإصابات تزادو ب14.. والمتابعين مافهمو والو

الخطأ وارد فبحال هذ الحالات لكن التوضيح ولا بدا خصو يكون، المديرية الجهوية للصحة فجهة الرباط سلا القنيطرة دوخات الناس بالأرقام اللي حطات اليوم الجمعة على الصفحة ديالها ففيسبوك، واللي كتتعلق بحصيلة الإصابات بفيروس كورونا المستجد فالاقاليم ديالها فهذ 24 ساعة الأخيرة.
فمن جهة علنات المديرية على تسجيل 11 لإصابة جديدة، لكن فاش كتجي تحسب، وبالمقارنة مع الإحصاءات اللي علنات عليها قبل فالأقاليم، فالمجموع ديال الإصابات اللي تزادو هو 14 لإصابة وماشي 11، بحيت تزلدو 7 جداد فتمارة، و7 جداد خرين فسلا.
ومن جهة ثانية، كاينة حاجة خرى فيها خطأ فادح وكبير، المديرية اليوم حددات عدد الإصابات بفيروس كورونا فالرباط ف118، فالوقت اللي كان عدد الإصابات فهذ المدينة وصل ل122، بمعنى تنقصات 3 ديال الإصابات.
وانطلاقا من هذ المعطيات، أي واحد متبع مزيان كيمكن ليه يستنتج بللي تسجو إصابات تابعين للرباط، وتبين من بعد باللي الأمر كيتعلق بناس كينتمويو لمدن تمارة أو سلا، اللي قراب بزاف للعاصمة، وكيمكن يوقع خلط.
هذ الديكالاج فالأرقام خلا مجموعة من المتتبعين ديال صفحة المديرية، اللي حطات هذ المعطيات، يعبرو على الاستنكار ديالهم، ومايفهموش مزيان آش واقع بالضبط فالأقاليم ديالهم، وكيدايرة فيها الحالة الوبائية، فالوقت اللي المديرية ما حطات حتى شي توضيح بشان هذ الخطأ.
وحاولات "كود" تتصل بالمدير الجهوي للصحة فجهة الرباط سلا القنيطرة، باش تسولو على الخلل فين كاين فهذ القضية، لكن الهاتف ديالو صونا بلا جواب.