قرار غريب عجيب. مغاربة كاعيين على الصحة والداخلية. واحلين فنص الطريق وما معلقين ما عارفين واش يسافرو ولا اللا

القرار لي دارت وزارة الداخلية فبلاغ مشترك مع وزارة الصحة، باغلاق 8 مدن اللي هوما طنجة، تطوان، فاس، مكناس، الدار البيضاء، برشيد، سطات و مراكش ابتداء من يومه الأحد 26 يوليوز عند منتصف الليل.
هاد القرار جا بناء على خلاصات التتبع اليومي، والتقييم الدوري لتطورات الوضعية الوبائية بالبلاد ؛ وفسياق تعزيز الإجراءات المتخذة للحد من انتشار هذا الوباء.
المشكلة مواطنين وسط الطريق مسافرين معارفينش شنو وقع، واش يبقاو لا يرجعو.
وهادشي كيتناقش مع خطاب رئيس الحكومة لي كيقول خصنا تشجيع السياحة الداخلية. هاد السياحة الداخلية غير كلام، حيث بان من امتحان عيد الاضحى بلي التجمعات كاتزيد الاصابات بكورونا.
مسؤول بوزارة الصحة قال ل"كود" بلي كيتوقعو يرتفع العدد مع العيد٬ نفس المسؤول يؤكد ل"كود" بلي الجينوم ديال الفيروس هو هو ولكن كلما ارتفعت عدد الاصابات طبيعي كيرتفع عدد الحالات الحرجة والوفيات.
المشكلة حسب عدة مواطنين هو ان قرار الداخلية والصحة نزل عليهم كالصاعقة وكان من الممكن تعطا مهلة 24 ساعة او 48 ساعة.
يشار أن القرار كيستثني الأشخاص ذوي الحالات الطبية المستعجلة، والأشخاص العاملين بالقطاع العام أو الخاص والمتوفرين على أوامر بمهمة مسلمة من طرف مسؤوليهم، مع شرط الحصول على رخص استثنائية للتنقل مسلمة من طرف السلطات المحلية.