خبار زوين للناس اللي تشفرولهم الفلوس من الكونطات ديالهوم فCIH. الفلوس غاترجع لماليها.. ومسؤول ل"كود": هدو هاكرز دخلو وسرقو للناس اللي مولفين يشريو من الأنترنت.. وهذشي فبانكات كثيرة ماشي غير عندنا.. والأمور تحت السيطرة دابا

بزاف دالناس رونوها صداع واحتجاج ف"فيسبوك" بعدما تشفرو ليهم فلوس صحيحة فالكونطات ديالهم CIH من موقع Apple.com.
سكرينات كتسيركيلا ديال بزاف دالناس لقاو اقتطاعات كثيرة فالكونطات ديالهوم وصلات حتى ل6000 درهم ومافهموش فين كاين المشكل بالضبط، وهكذا حملو البنكا كل المسؤولية على هذشي اللي وقع، وطالبوها باش ترجع ليهم فلوسهم.
نشطاء خرين رجحو يكون هذشي بسباب الدوطاسيون "إي- كوميرس" والدوطاسيون "توريستيك" اللي كاين اللي كيخليها مآكتيفيا فلابليكاسيون فالكونط ديالو، بحيث هذ الخاصيات اللي كتخول الخلاص على الأنترنت إلى بقاو مآكتيفيين كيبقى الكونط محلول، وكيمكن يتشفرو منو الفلوس بسهولة.
"كود" سولات مسؤول فبانكا CIH على المشكل فين كاين بالضبط، وقال البانكة ماشي مسؤولة على هذشي، وأن الأمر كيتعلق بمجموعة من ليهاكرز اللي سهال عليهم يدخلو لكونطات الناس اللي كايشريو ليزارتيكل من لانتيرنت، وتحديدا من موقع "آبل" من برا، وأكد أن هذشي كيتعلق ببنكات كثيرة من غيرها.
وبخصوص خاصية "الدوطاسيون"، نصح المسؤول البنكي الناس باش يردو البال إلى خداو شي حاجة من لأنتيرنيت عامة، ويحرصو على ديزاكتيفاسيون ديال دوطاسيون "إيكوميرس" والدوطاسيون "توريستيك"، باش يتجنبو هذ المشاكل اللي كتعتبر فرص كينتهزوها عصابات إلكترونية.
وبالنسبة للفلوس واش غترجع ولا لا، قال المسؤول أن شركة "آبل" تدخلات لحل المشكل، والبنكا كذلك غاتقوم باللازم باش الأمور ترجع لمجاريها، و"دابا راه كلشي تحت السيطرة"، وفق التعبير ديالو.