الملياردير الجديد طرونباطي ل"كود": ما حيدوش لي الباسبور وما سدوش علي الحدود. تهم فقضية "بروديك" خلات الفرقة الوطنية تسمع ليه

نفى الملياردير الجديد احمد طرونباطي ان تكون الفرقة الوطنية للشرطة القضائية اللي سمعات عليه سدات عليه الحدود او حيدات ليه الباسبور. وقال ل"كود" "ما حيدوش لي الباسبور وما سدوش عليه". الفرقة الوطنية للشرطة القضائية اسمتعات ليه البارح على خلفية فيديوات كتهم صفقة "بروديك"
كانت اخبار هدرات على ان الطروتباطي حيدو ليه الباسبور وسدو عليه الحدود٬ لكن كود" اطلعات على الجواز ديالو
رجل الاعمال الجديد يعني فيساع ولى ملياردير٬ كان شرا شركة الصباغة "بروديك" من مولاها سعيد بن شرقي. ولكن بقات بزافت الامور ما واضحاش. منها كيفاش هاد بن شرقي خرج من المغرب؟ واش باع ولا اللا. واش وقع تزوير فعملية البيع والتوقيع والمصادقة على الوثائق ولا للا…..
بنشرقي كان خرج اخيرا ففيديو وحتى الشيفور ديالو فجر امور كثيرة.
كود كانت ف2017 هدرات على هاد بن شرقي وعلى كيفاش خرج وعلى عملية التفويت او ما عرفنا اش سميتو.
دابا واش الطرنباطي ولد لقصر لكبير اللي عندو اسم فشي شكل ماشي ديالنا حنا لمغاربة٬ عندو علاقة بشي مسؤول قضائي كبير ولا اللا. المهم الفرقة الوطنية غادية تجيب لينا معطيات كثيرة.
دابا الملف عاد خرج ولكن سنة قبل الانتخابات ديال القضاة خلى هاد الشي ياخد اتجاه اخر. شي يحفر لشي
المهم الطرونباطي مازال عندو الباسبور ديالو والتحقيق مازال مستمر طبعا