سياسي وحيد خاصو يخرج ويتكلم هو بنكيران. المقاطعة عندو: مشبوهة ولكن كلامو دابا مهم بزاف على الخطر اللي غادية ليه لبلاد

السياسي الوحيد اللي خرج وكلامو عندو مصداقية. اللي هو عبد الاله بنكيران رئيس الحكومة اللي حيدوه باش يجيبو بنعرفة والامين العام لحزب العدالة والتنمية. مصداقيتو انو كيتكلم بلا زواق. كود. ديما نيشان. كان الوحيد اللي صرح باللي هاد المقاطعة “مشبوهة”. ماشي بريئة. تثير الريبة. صرح بهاد الشي ل”كود”.
بنكيران كان غادي يتكلم فلقاء بشبيبة الحزب فمراكش. دار بناقص. فهاداك الوقت عندو الحق ياخد الاحتياطات. ما كانش وقت لكلام.
دابا خاصو يخرج. مازال ما تكلمش. باش تفهمو المقاطعة كيفاش تحركات وعلاش خاصو يتكلم. غادي يوضح امور كثيرة. رجل دوز 5 سنين فتسيير امور الدولة. عرف موازين القوى مزيان. عرف توجهات الدولة. وقف على المشاكل اللي كتخلينا ما نديروش الانتقال الديموقراطي. كلامو مهم. اكيد غادي يصدم انصار الحزب وخاصة شبيبتو اللي كتدعم بشكل كبير المقاطعة. لكن كلامو غادي يكون اكثر على الوضع السياسي. علاش وصلنا لهاد المستوى. شكون المسؤول او الجهة المسؤولة للي وصلتنا لهاد الحالة. رئيس حكومة صم بكم ما عارفاش باش منفوخة. بنعرفة وصافي.
وزراء تالفين ما قاردينش يدافعو على انفسهم. ماشي اللي معنيين بالمقاطعة فقط. بل وزراء اخرين. فريق حكومي مشتت. لاحظوا تعامل هاد الحكومة مع كافة الحركات الاحتجاجية من اكثر من عام باش وصلات.
كاين خلل كبير. خلل سياسي كبير. المشكلة هي مشكلة ديموقراطية. مشكلة انتخابات. واش باغيين الديموقراطية ولا اللا. واش خاصنا نحتارمو الانتخابات ولا اللا. باش ينحج حزب بقيادة زعيم واش خاصو يكون هو رئيس الحكومة ولا نجيبو الضعيف فالحزب ونعينوه.
كيفاش ممكن نسمحو للاحزاب دير خدمتها. كيفاش ترفع الداخلية يدها على عمل هاد الاحزاب. واش خاصنا نحاسبو المسؤولين اللي تورطو فاحداث بحال الريف ولا اللا. علاش هاد الجرح غادي يبقى نايض وممكن يتعفن وفهاد الحالة ما كاينش شي حل الا تحيدو.
الوضعية اليوم خطيرة ماشي على تدعيات المقاطعة. خطيرة حقاش بانت هاد المقاطعة. ظهورها واستغلالها من قبل اكثر من جهة وركوبها عليها كيبين باللي الوضع خطير.
خاص بنكيران يتحمل مسؤوليتو ويخرج يتكلم. اللي صوت صوت عليه ماشي على بنعرفة واخا هو دارو ليه كاع اللي ممكن تتصورو باش ما يزيدش 5 سنين اخرى من مسيرة ولد زروال حتى توظيف حراك الريف ولكن المواطن اللي عطى صوتو ليه محتاج يسمعو. يشرح ليه. يعطيه وجهة نظرو. يفسر ليه. لهاد الاسباب خاصو يخرج. اللي نصحو بالصمت باغي يجني مكاسب سياسية وصافي. كاع اللي عندهم معطيات حول الوضع السياسي فالبلاد عارفين باللي بنكيران باقية عندو شعبية كبيرة. غير على هاد الشعبية خاصو يكسر الصمت. من بعد يمكن غادي يفوت الفوت