الجيش المغربي خاصو يبدل استراتيجتو فالتواصل. راها معركة مهمة بزاف والبوليساريو بدات تغرق الويب بادعاءاتها وحنا عندنا قناة "لعيون" وما دايرين والو

المغرب جرا على اتباع البوليساريو الستين اللي كانو معرقلين الحركة التجارية فالكركرات فالمنطقة العازلة هاد الصباح. دار الجيش المغربي بيان ودارت الخارجية بيان.
البوليساريو حتى هي ردات ببيان وتحركات مواقعها اللي تابعة ليها وبدات كتخرج خبار. حرب حقيقية بدات فالانترنيت.
الجيش المغربي تقيليدي بزاف فالتواصل ديالو. لحد الان ما دار والو من غير بيان رسمي. ما رسل صور ولا فيديو. البوليساريو سبقاتو وبدات تطلق اشاعاتها. دايرة حرب كبيرة.
المغرب واخا يربح بسرعة المعركة على الارض واخا يحسم عسكريا هاد المعركة المرتقبة ماشي معركة الكركرات بوحدها راه رباح ناقص ايلى كان تهميش كبير للاعلام.
دابا كان قناة لعيون تكون اول من صور هاد التدخل فالصباح. لحد علم "كود" ما فراسهم والو بحالهم بحال باقي لمغاربة. حتى هما قراو البيان ديال الجيش والخارجية.
دابا واش الدولة باغية تربح المعركة؟ راه خاصها توظف قناة لعيون فالصفوف الامامية بمراسليها وصحافييها ونقل مباشر كاع للعملية. راه التواصل اهم بكثير فبعض المواقف من الحرب نفسها.
هادي قناة للصحراويين وكيشوفوها ناس البوليساريو واللي عايشين فالرابوني. علاش ما توظفش بشكل مزيان.
هادي مسؤولية الجيش المغربي وقيادتو. راه فالسبعينات والثمانينات باش كانت الحرب كان الاعلام الغربي مع الجيش المغربي فالمقدمة ودارو ربورطاجات ومراسلات..، كيفاش قادة الجيش فالسبعينات كانو اكثر تفهم لدور الاعلام مقارنة بالقادة الحاليين للجيش. هادا فالوقت اللي العالم تغير بمواقع التواصل الاجتماعي. مفارقة كبيرة.
الجيش خاصو صفحات ماشي صفحة خاصو مواكبة دقيقة للعمليات ينقلها للمغاربة. لحد الان ربح فالتيران وخاسر فالتواصل. مازال عندو الوقت باش يرجع هزيمتو فالتواصل انتصار ايلى بغى.
حشومة ان اول فيديو واول صورة اللي وقع فالكركرات تكون ديال البوليساريو: ها الصورة وها الفيديو ومجموعة من التسجيلات كلها ادعاءات وكذوب
https://www.facebook.com/1292968250744243/posts/4614307415276960/?vh=e&d=n