الوزير المنتدب جازولي لقناة إسرائيلية: علاقة المغرب مع إسرائيل ماشي تطبيع لكن إعادة تفعيل القنوات الديبلوماسية بين البلدين.. ومنطق الدولتين هو الحل من أجل السلام – فيديو

اعتبر محسن جازولي، الوزير المنتدب لدى وزير الشؤون الخارجية والتعاون الدولي، المكلف بالتعاون الإفريقي، أن علاقة المغرب مع إسرائيل ماشي تطبيع، لكن إعادة تفعيل القنوات والميكانزمات الديبلوماسية بين البلدين، واللي قال أنها كاينة أصلا، واللي هما نتاج واحد السيرورة طويلة عندها جدور فتاريخ المغرب.
وزاد جازولي، فلقاء مباشر ليه فبرنامج "Le grand Live" فالقناة الإسرائيلية "I24news"، أن اليهودية كاينة فالثقافة المغربية، وجزء من لاديين ديال المغرب فيه هذ التاريخ اليهودي اللي تكلم عليه الدستور المغربي، وكشف أنه قريبا غادي يتعلم فالمدارس المغربية وغيكون فالمناهج الدراسية.
وفشرحو لطبيعة العلاقات بين المغرب وإسرائيل، اعتبر أن البلاغ ديال الديوان الملكي كان واضح، بحيث غيكونو مجموعة من الميكانزمات اللي غتعاود تتفعل، بحال الطيران المباشر بين الدولتين، وفتح مكاتب التواصل اللي كانو ديجا ف1994، باش يرجعو العلاقات الدبلماسية.
وتابع الوزير المنتدب أنهم غيكونو علاقات سياحية اقتصادية فالبحث العلمي وفالتنمية، والفلاحة اللي كيشوف أنها متشابهة بشكل كبير بين المغرب وإسرائيل، وكاين مايدار فيها، وهكذا شاف ان التعاون غيكون مزيان ومثمر.
وأكد أن المغرب هكذا كيسعى للسلام فالمنطقة الفلسطينية الإسرائيلية بنفس المنطق اللي كان عندو قبل، أي بمنطق جوج ديال الشعوب وجوج دول، يعيشو جنبا إلى جنب فأمن وسلام.
وفالمقابل قال الوزير المنتدب أن المغرب دائما غيبقى فجنب الفلسطينيين، لأن القضية الفلسطينية فقلب جميع المغاربة، وكذلك الحكومة المغربية، والملك محمد السادس اللي هو رئيس لجنة القدس.
أما بخصوص اعتراف أمريكا بسيادة المغرب على صحراؤو، كيشوف جزولي أنه قرار مهم بزاف لجميع المغاربة، حيت دابا ولات أكبر دولة فالعالم كتعترف بمغربية الصحراء الكاملة، وهذ الحاجة كتفرح القلب ديال المغاربة كاملين.
وفختام اللقاء، قال أنه كيتمنى الفلسطينيين والإسرائيليين يعيشو فسلام دائم، وعتبر انه ضروري الحوار مع الطرفين بجوج من أجل الحل.
وهذا لقاء الوزير المنتدب محسن جازولي الكامل على "I24news":