انا كمحايدة ماشغليش فالصراع الفلسطيني الإسرائيلي.. لكن إلى البلاد لقات مصلحتها فالتطبيع شكون أنا باش نوافق ولا نرفض.. إسرائيل دولة قائمة الأركان بغينا ولا كرهنا.. وكنفضل جميع شعوب العالم ينساو اللي فات ويعيشو فسلام عوض القتيلة والحروب

الفيسبوك ومواقع التواصل الاجتماعي تقسمات على جوج، شي مع تطبيع المغرب علاقاتو مع إسرائيل، (ولو أني ماعنديش مع هذ العبارة ديال التطبيع كتجيني بحالا مطبعين مع شي جريمة)، وشي ضد بحكم أن إسرائيل، كيف كيشوف هو، دولة مستعمرة وجات خدات للناس أراضيهم وا وا وا وكلشي عارف الفيلم وما فيه...
أنا شخصيا كمحايدة، ما مع هذو مامع دوك، مشكل بحال الصراع الفلسطيني الإسرائيلي أنا كنشوف بللي ماشغليش فيه لا من قريب ولا من بعيد، وماكنحس بحتى شي قرابة كتجمعني بأي دولة من هذو بجوج، تماما بحال الحياد اللي واخداه فصراع روسيا وأكرانيا على شي جوج شبورا دالأرض، هذشي بعيد عليا وشغالهم هذوك.
فالمقابل، كنشوف بأن الدولة المغربية إلى لقات مصلحتها فتطبيع العلاقة مع إسرائيل، الله يعاونها، أنا مالي؟ شكون انا باش نوافق ولا نرفض؟ وعلاش خاصني بضارورة نوض نغوت فالفايسبوك ونجتر داك الهضرة اللي سمعناها كاملين من الجزيرة، واخا عرفين ومآمنين أن هذ القناة الخوانجية ماشي غير كتزيد فيخرات، كتغرق بنادم بالأخبار المضللة وتوجهو صحا وتخليه كي البهيمة تابع جيلالة بالنافخ، ومع الشعب ديالنا يا حسرى ماقاريش وماواعيش ومافاهمش، هذشي عاد ما كيسهل عليها المأمورية..
نمشيو معاكم بعيد ونقولو أسيدي هذ إسرائيل بنت الحرام واغتصبات الناس فأراضيهم، إيوا راه هذشي شحال هذي كان جاري به العمل، وهذشي فعلا مؤسف ومؤلم، علاش الدولة العثمانية قبل ما تنهار ماحتلاتش النص الكثير من الشرق الأوسط وشمال إفريقيا وجزء كبير فأوروبا، ما سباتش وعذبات وشردات وريبات؟ علاش فاش كانو الفتوحات الإسلامية كانو الخلفاء الراشدين والأمويين والعباسيين كيدخلو على الناس بأكاليل الورود؟
وإلى جا كل واحد يرجع لأصلو وبلاصة جدودو (ولو أن إسرائيل زمنيا هذيك هي بلاصتها) راه غادي تنوض فوضة كبيرة فالعالم، ويولي شي يطحن شي، ونرجعو للمطايفات القومية والحروب بين الدول والأعراق، ونوليو براهش.
أنا ماشي كندافع على إسرائيل، أو كنبرر جرائم بصح اقترفاتهم، على قلتها أو كثرتها، لا مطلقا، فنظري أي دولة فالعالم خاصها تعترف بأخطاءها ضد الإنسانية، وتعتذر، وتحترم الشعوب مستقبلا، ويعيش كلشي فسلام وطمأنينة، بعيدا عن هذ قتلني نقتلك، لكن مانساوش حتى الحركات الإرهابية اللي سوا ديزون "تحريرية" و"مقاومة للاحتلال"، وكتدعم فلسطين واخا شابعة فلوس مزيان فهذ البيعة وشرية، راه نصها حركات إرهابية، بتمويل عربي حتى هي قتلات ودمرات وخلقات الرعب فنفوس إسرائيليين عزل، منهم أطفال مازال مافاهمين والو فالحياة وماعندهم حتى شي ذنب فهذشي كامل.
نكونو واقعيين.. إسرائيل راها دولة دابا، قائمة بذاتها، وكاينة ومعترف به دوليا، وفلسطين كذلك دولة كاينة ومازالة، والشعبين بجوج نهار على نهار بداو يتعايشو مع بعضهم، وينساو اللي فات من حروب ودماء سالت ومصائب كحلة، وكنشوف ممكن إلى عطاو للإسرائيل فرصة تقدر شحال من حاجة تصلح، ويتم الاتفاق على حدود الأراضي، ويعيشو الشعبين فسلام وطمأنينة، حيت نزاعات بحال هذي أكيد كتحل بالحوار والتفاوض.
ودابا الواضح أن المغاربة نهار على نهار بداو يوعاو بهذ الأمور، بزاف ولاو داخلين سوق راسهم ومبعدين كرموصتهم على هذشي، وكاين فيهم اللي عاق بالإعلام الخوانجي، وولا ياخد المعلومة من مصادر أكثر ثقة، أو يزاوج بيناتهم بجوج، بمنطق وبلا عواطف أو أحاسيس قومجية.