وفضيحة كبيرة هادي. اللي قتل الغماري هي وزارة الصحة. معتوق: تسنى 30 دقيقة لامبيلانص وباش جات ما كانش فيها الاوكسجين وجات الثانية وفيها غير شوية ومشى لكلينيك ما لقاش بلاصة ومات قبل ما يوصل للثاني

معطيات خطيرة كشفها جمال معتوق الاستاذ الباحث في القانون الخاص بكلية سطات وصديق مقرب بزاف للصحافي ف"دوزيم" صلاح الدين الغماري. ففي برنامج فاذاعة "اصوات" قدم معطيات على الدقائق الاخيرة من حياة الصحافي. قال باللي جاتو سكتة قلبية وعيطو على لامبيالص. جا عندو طبيب من جيرانو ولقاه فاقد الوعي ولكن كيتنفس بصعوبة. دار ليه الماساج كاردياك. وصلات سيارة الاسعاف الاولى. ما لقاوش فيها الاوكسجين يقول معتوق
وتسناو الثانية. وصلات ولقاو فيها غير شوية الاوكسجين يحكي الاستاذ الباحث اللي كيخدم خبير مع اذاعات خاصة منها دوزيم واصوات.
واخا فيها غير شوية يقول معتوق للاذاعة٬ داتو لكلينيك. لقاو لكلينيك عامر. وهما غاديين بيه لكلينيك اخر مات فالطريق
الباحث المتخصص فالقانون الخاص قال باللي خاص اجراءات قانونية قضائية لمتابعة المقصرين.
المقصر هنا هي وزارة الصحة. كيفاش تخلي اومبيلانس تتحرك بلا اوكسجين. معتوق قال باللي جميع سيارات البومبية يستحيل تخرج بلا اوكسجين.
دابا خاص متابعة الوزارة ومحاسبة الوزير اللي ماشي هادي اول فضيحة دارها. عشنا قصص مغاربة ماتو بسباب عدم التوفر على الاوكسجين