مرا كبيرة ماتت فطنجة.. عائلتها كانت احتجات بسباب "الاهمال".. وولدها كيعاود ل "گود" التفاصيل

توفات سيدة مسنة مريضة بفيروس كورونا المستجد، الساعات الأولى من صباح اليوم، فسبيطار محمد السادس فطنجة، بعد احتجاج ابنها وابنتها على "سوء المعاملة" ديالها من طرف طبيب وممرضين.
ابراهيم بان هو والأخت ديالو فمجموعة من الفيديوهات كيغوت فالباب ديال السبيطار، وكيحتج على "سوء المعاملة" ديال الوالدة ديالو، وأن حالتها تدهورات كثر بسبب الإهمال.
وفاتصال "كود" بابراهيم، قال أن الوالدة ديالو كتدير الدياليز، وأن حالتها مؤخرا تدهورات، فاش دارتو مؤخرا عند الطبيب ديالها شك واش فيها الفيروس، ودارت التيست وخرج ليها إيجابي، ومنين دارت السكانير تبين ان ريتها مقيوسة بنسبة 50 فالمية.
ولبارح مع 8 ونص دالعشية دخلات الأم ديال ابراهيم للسبيطار دمحمد السادس، وتعمل ليها الاوكسيجين، لكن الاطر الصحية اللي تكلفو بحالتها قالو انهم مايقدوش يعطيوها شي دوا حتى تشوف مع الطبيب ديالها دالدياليز، بحكم أن وضعيتها خاصة، وانها خاصها تمشي لمصحة أخرى مكلفة ببحال هذ الحالات الحالات.
وزاد ابراهيم أن هذ المصحة حتى هي مابغاتش تشد الوالدة ديالو حتى عيط للصحافة ووسائل الإعلام، وانه وقع فمناوشات حادة مع الطبيب اللي كاين فمحمد السادس، بحيث اتهمو هذ الأخير بالتصوير ديالو دون الإذن ديالو والتهجم عليه، بينما الأم ديالو كانت فهذ الأثناء توفات فالمصحة، اللي دخلات ليها مع منتصف الليل.
وكشف ابراهيم أنه اتجه مع الطبيب اللي اتهمو للدائرة السادسة دالبوليس، وان الطبيب تقدم ضدو بشكاية ديال تصويرو بدون اذنو والتهجم عليه، بينما ابراهيم فنفس الوقت حط شكاية ديال الإهمال اللي أدى لوفاة الام ديالو، كيف كيقول.
وحاولات "كود" تتصل بالرقم الهاتفي الخاص بسبيطار محمد السادس، لكن الخط مشغول.