الوضع الصحي فمستشفى "ابن زهر" فمراكش خارج على السيطرة.. أوديوهات تسربو كيتكلمو على بلوكاج مصالح المستعجلات وبنادم ناعس فالارض والطبة قلال.. والمسؤولين ماكيجاوبوش -اوديوهات

واقيلا الوضعية الصحية فالمستشفى الجامعي ابن زهر ولات خارجة على السيطرة، بحيت تسربو أوديوهات ديال جوج طبيبات حاصلين فأقسام المستعجلات التابعة لهذ المركز، بسبب قلة الأطر الصحية اللي خدامين، وكثرة الناس اللي حالتهم حرجة.
طبيبة سميتها "البحتري" كترغب وتزاوكَ فالزملاء ديالها، عبر أوديو فالواتساب، باش يعاونوها، حيت هي غير بوحدها اللي خدامة فقسم المستعجلات فالمامونية، ومعاها مرضى الوضعية ديالهم صعيبة بزاف، بالإضافة لمرضى "كوفيد 19".
كارثة كبيرة فصبيطار بن زهر بمراكش: كلشي كيقلب على الدكتور البحتري وكلشي تغلب
Publiée par Goud.ma sur Dimanche 16 août 2020
طبيبة خرا حاولات تساعد صاحبتها لكن ماقدراتش، ماتكلماتش على آشمن مركز استشفائي كاينة فيه بالضبط، لكن قالت أن المرضى عندها كاين منهم اللي ناعس فالأرض، وقسم الإنعاش فيه مرضى كثار، وحاولات تسيفط مرضى يتعالجو فالمستشفى الجامعي محمد السادس/ الرازي لكن رجعوهم وقالت بللي كلشي واقعين فنفس الوضع وحاصلين.
وحاولات "كود" تتصل بالمديرة الجهوية للصحة بجهة مراكش آسفي، لمياء شاكيري، لكن قطعات التيليفون، كيف حاولات تتصل بمدير المستشفى الجامعي، هشام نجمي، بالإضافة للمكلفة بالتواصل فنفس المستشفى، جهان قداد، لكن تيليفوناتهم صونات وحتى واحد ما جاوب.
وغير هذي أربعة أيام، طلب محمد المحمدي، المدير المؤقت للمستشفى الإقليمي "المامونية"، الاستقالة من المنصب ديالو، بسبب الوضع الكارثي اللي كيعرفو السبيطار.
وماكاملاش شهراين باش تعين المحمدي حتى طالب بالإعفاء ديالو من هذ المنصب، اللي كان خدام بصفة مؤقتة من بعد إعفاء مدير المستشفى السابق الكبير لمسايري، بعدما تسربو فيديوهات ديال مرضى "كوفيد 19" كيبانو فيها مجمعين على طباسل اللوبية والعدس.