واش غيتحاسبو المسؤولين على فيضانات كازا.. نائب العمدة حيكر: كنتسناو نتائج الخبرة التقنية باش نعرفو واش "ليديك" قصرات فمهمتها

تكلم عبد الصمد حيكر، عضو مجلس الدار البيضاء عن حزب العدالة والتنمية، على تفاصيل اجتماع الولاية اللي كان لبارح، واللي تدارس مشكل الفيضانات اللي عرفاتها كازا هذ الأيام.
وكشف حيكر أن المسؤولية المباشرة كتتحملها الشركة المكلفة بشبكات التطهير السائل "ليديك" بتفويض قانوني تعاقدي، لكن مازال لحد الساعة ماتعرفش واش كاينة مسؤولية تقصيرية ليها أو لا، ومازال كيتسناو نتائج تقرير الخبرة التقنية اللي كيشرف عليه رىيس مجلس المدينة.
وزاد، فتصريحو لموقع "كازابلانكا الآن"، أنه فهذ اللقاء تم الاستماع لعرض "ليديك" حول معطيات تدخلات قامو بيها أثناء تعاطيهم مع الفيضانات، والمنتخبين عبرو على حالة القلق والغضب اللي عبرو عليها الكازاويين، وخصوصا منهم المتضررين، وكان نقاش حدد مدى تجاوب "ليديك" مع شكاياتهم.
وبشأن التوصيات ديال الاجتماع، كيقول حيكر أنها تلخصات فتحسين علاقة القرب مع المواطنين، والتعامل الإيجابي مع الشكايات، وتعزبز ومضاعفة المجهودات فهذ الفترة إلى بداية الاسبوع المقبل، كيف تقدمات مقترحات تطوير العلاقة التعاقدية للسلطة المفوضة و"ليديك"، وتم التشديد على ضرورة مضاعفة الاعتمادات اللي كترصد لزيادة حماية كازا من الفيضانات، والسعي للاتصال مع الدولة باش تكون شريك أساسي لتمويل المشاريع فهذ الإطار.