نايضة فالطوائف اليهودية بسباب وحدة باغة تجيب راديكاليين فبلاصة سيرج بيرديكَو وتدير انتخابات.. وإيمان يونس ل"كود": عايراتني وسباتني وهضرت معاها بفوكونط وقالت أنها بغات ترجع الربيع العربي للبلاد – فيديو

كشفات إيمان يونس، المغربية المقربة من الطائفة اليهودية، معطيات على نية يهودية مغربية تدعى (ل.ب) لإسقاط ولاية سيرج بيرديكَو، الأمين العام لمجلس الطوائف اليهودية بالمغرب، باش يولي فبلاصتو يهودي راديكالي أجنبي، ماعندوش علاقة بالطائفة اليهودية فالمغرب.
إيمان، واللي هي بنت الموسيقي المغربي الحاج يونس، تحدثات ل"كود" على محاولة (ل.ب) تجييش أعضاء الطائفة اليهودية ضد بيرديكَو، وتحرض باش تكون انتخابات، واخا كتقول أنه كاين ظهير شريف كيمنع تكون بالنسبة للأقليات اللي مكيتجاوزش العدد ديالها 5000 فرد، بينما الطوائف اليهودية فالمغرب كتضم 800 يهودي، حسب آخر الإحصائيات.
وكشفات يونس، اللي تعرفات بفيديو تنتشر على نطاق واسع فمواقع التواصل الاجتماعي، فرد ليها على (ل.ب)، أن هذ السيدة دارت كَروب ف"واتساب" هذي عام فيه 350 واحد، مكونين من يهود مغاربة فالمغرب وخارج المغرب، فاللول كانت كتشكر فبيرديكَو، ومن بعد بدات تعاير فيه، وتطالب بانتخابات جديدة، وتحاول تجلب أكبر عدد من اليهود فصفها، لكن كتقول يونس أنه ما تسوق ليها حد، وبزاف ديال اليهود المغاربة خرجو من هذ المجموعة.
وقالت يونس أنها فاش بغات توقفها عند حدها، عايراتها، وقالت انها دارت الزنا مع بيرديكَو، وكتبات معطيات كثيرة على ولدها، واتهمات بيرديكَو بالشفرة، ومازال لحد الساعة كتكتب عليها وتشهر بيها، وكذلك ماسلمش يوشياهو بينتو، المسؤول على فرع مطاعم "الكاشروت" فالمغرب، من تشهيرها، وكَاع الناس اللي ضدها.
وباش تعرف شنو تحت راسها بالضبط، قالت إيمان أنها انتحلات شخصية يهودية، بموافقة من الطائفة اليهودية فالمغرب، وتكلمات معاها فالفايس، فحكات ليها على أنها مدعومة من أشخاص عندهم نفوذ كبيرة، وأنه قريبا غتكون ثورة فالمغرب شبيهة للربيع العربي.
من جهة خرى، يونس نبهات لخطر استمالة اليهود المغاربة من طرف (ل.ب)، واخا الأغلبية عارفينها على حقيقتها، وبغاو يطردوها من الديانة اليهوديو لولا خوفهم من المشاكل، "والأخطر أنها كتجمع معلومات على أعضاء الطوائف اليهودية باش فاش يعيقو بيها تبتزهم وتهددهم بالتشهير والفضيحة إلى قررو مايبقاوش فصفها"، حسب تعبيرها.
وقالت أنه إلى يهودي راديكالي عايش برا شد الطوائف اليهودية المغربية، اللي ماعندو بيها حتى علاقة لا من قريب ولا من بعيد، ف"ممكن نقولو بسلامة لليهود المتبقين فالمغرب"، على حساب هضرتها.
واللي كيهم هذ السيدة، وحتى الراديكاليين اللي دايرين عينيهم فمنصب بيرديكَو بحال (كَ.ه) المتدين المتطرف، و(د.) اللي، حسب يونس، كان عندو مشكل مع البوليس وهرب، وبالنسبة ليها فهذ الناس همهم الوحيد هوما الأراضي اليهودية اللي غيبيعوهوم ويقسموهم بيناتهم وغيهضمو حقوق ماليهم إلى قدرو يتراسو الطوائف، فيحين أن هذ الأراضي الآن برئاسة بيرديكَو محمية من طرف الوكالة الوطنية للمحافظة العقارية.
وقالت يونس أن بزاف رفعو دعاوى قضائية ضد (ل.ب)، اللي منهم هي وبيرديكَو واستاذة كتقري فليسي ليوطي ورهبان.
ونفات يونس الأخبار اللي كتروج لكونها يهودية، وقالت أنها مسلمة أبا عن جد، لكنها تربات وقرات وكبرات مع اليهود فشارع مولاي يوسف، وبقات عائلتها متعايشة معاهم، وكونات علاقة طيبة مع اليهود.
وتنشر مؤخرا على مواقع التواصل الاجتماعي فيديو ليونس كترد فيه على (ل.ب)، وقالت فيه أنها بهذ التثرفات "ماشي يهوديو وعمرها ما بغات الخير لليهود المغاربة"، وهذو مقتطفات من الفيديو:
https://www.facebook.com/1292968250744243/posts/4870156979692001/