واخا بغاو يجريو عليه من الحزب غيترشح للانتخابات. زيان ل"كود": المقاطعة ماعندها فايدة وأنا بغيت نترشح باش نصلح المغرب.. ومؤتمر الحركة التصحيحية غير لعب الدراري وهضرة دالحمام

هذ الأيام خرج زيان بفيديو حطو على الصحفة ديالو بموقع التواصل الاجتماعي "فيسبوك"، هضر فيه على النية ديالو للترشح فالانتخابات بصفتو المنسق الوطني للحزب المغربي الحر، فالوقت اللي أعضاء المجلس السياسي للحزب جمدو ليه العضوية وكيستعدو لمؤتمر استثنائي باش يجي حد آخر بلاصتو.
بشان ترشيحو فالانتخابات، من بعد المقاطعة قبل، قال زيان، فتصريحو ل"كود" أنه كمواطن مغربي من حقو يترشح، حيت "لا فائدة من المقاطعة وناس خرين كيستغلو الانتخابات وهوما اللي كيطلعو… وبالمقاطعة مايمكنش نديرو ثورة"، على حد تعبيرو.
وزاد: "صبنا وصبرنا لكن ماعجبناش المغرب، وفنفس الوقت كنحبوه وكنحماقو عليه، بغينا داكشي اللي فيه خايب نبدلوه، والبرلمان يقرر والشعب يصوت علينا… وهذشي واجب على كل مواطن كيبغي بلادو".
وزيان بحال عادتو رفض الحديث على رأيو على المؤتمر الاستثنائي اللي غيكون ف30 و31 يناير الحالي ل"كود"، واللي غيتم فيه انتخاب منسق آخر للحزب، وقال "تادريت ماكنجاوبش عليها، كنجاوب على داكشي المعقول، أما الدراري والهضرة الخاوية والهضرة دجحا ودالحمام كيضيعو ليا وقتي".
وأكد زيان أن ف1 فبراير غتكون جلسة محاكمة عناصر فالحزب انتحلو صفة قياديين، وكينتميو للمجلس السياسي اللي جمع صلاحيات المكتب السياسي وصلاحياتو كمنسق وطني، "ومنهم واحد عندو 7 أحكام زجرية من أجل النصب… دخل 7 مرات للحبس بسبب النصب، وفوق هذشي عمرو كان فالحزب…"، على حساب كلامو.