ها كيفاش سالات الدورة غير العادية لبرلمان السبع اللي وقفات صلاحيات زيان.. هتافات برحيلو وأعضاء بخصوص دعوتو القضائية ل"كود": كلام فارغ وأمر مضحك – فيديو

الدورة غير العادية اللي دارها برلمان الحزب المغربي الحر لبارح فالرباط سالات بتجميد المكتب التنفيذي وصلاحيات محمد زيان باعتبارو منسق وطني للحزب، مع تكليف حسان موساوي برئاسة اللجنة التحضيرية للمؤتمر الوطني الاستثنائي اللي غيتم الإعلان على التاريخ ديالو لاحقا.
وحسب تصريح عضو المكتب السياسي، إسحاق شارية، ل"كود"، الدورة حضرو فيها 36 عضو من أصل 42، بالإضافة لأعضاء شبيبة الحزب اللي واكبوها عبر تقنية التناظر عن بعد، بينما توجهات الدعوة لزيان وأمين المال وحتى واحد ما جا.
من جهتو قال موساوي، اللي غيتكلف دابا بقيادة الحزب إلى حين انعقاد المؤتمر الاستثنائي، أن هذ اللقاء "تدار من أجل الحركة التصحيحية وضد القرارات الفردية ديال المنسق الوطني"، و"منذ تأسيس الحزب عمر زيان تواصل معانا… ومن نهار كاين الحزب وهو كيطالبنا بمقاطعة الانتخابات، وهكذا كنفتحو المجال للمفسدين"، كيف قال
وزاد: "هرمنا من هذشي ديالو !! والحركة قالت كفى من الديكتاتورية، وولا كيهددنا باننا ماكناش فالحزب، راه حنا كنا فالحزب وهو اللي ماكانش، وكان هو كيستفد من الريع والسفريات وحنا ماعندناش حتى السدادر فالدار".
وبخصوص الدعوة القضائية اللي رفعها زيان ضد أعضاء الحركة التصحيحية، كيقول شارية: "هذا أمر مضحك ومؤسف، باش خلافاتنا ونقاشاتنا نكملوها فالمحاكم.."
مزيد من التفاصيل وتصريحات أخرى فالفيديو: