اش الفرق بين بامي مراكش وبرلماني اخر من نفس الحزب وثالث من حزب العود اللي دارو الڤاكسان قبل لمغاربة فسفارة الامارات. كيفاش ممثلي "الشعب" قلبو على ريوسهم وسبقو الملك ودارو اللقاح

البارح خرجات ولاية مراكش تانسيفت بيان على عضو غرفة التجارة والصناعة البامي ياسر اليعقوبي. مراتو الصيدلانية دارتو فلائحة الصيادلة باش يدير الڤاكسان ضد كورونا بلا ما يكون من الفئات المستهدفة. عندو مطعم ولى فارماصيان. دابا خاص الدولة تابع هيئة الصيادلة او توقف تلقيح ناسها حتى تفهم اش وقع. واش كاين غير هاد الحالة ولا حالات كثيرة.
لكن هاد البامي ماشي حالة خاصة. قبلو كان برلماني من نفس الحزب مع برلماني اخر من حزب العود ورؤساء شي اندية معروفة فالمغرب دارو الڤاكسان الصيني عند سفارة الامارات بالمغرب بوساطة من سمسار فاللعابة داير خيطي بيطي لهاد الدولة.
هادو حتى حد ما هدر معاهم. فحالة اليعقوبي راه قضيتو عند النيابة العامة وغادية تكون متابعة ليه٬ لكن اللي داروه البرلمانيين اغرب. حقاش هادو اكتاسبو ايلى بغينا نقولو هاد الهالة من منصبهم فالبرلمان. كذبو على اللي صوتو عليهم. شوهو بلادهم. ما عندهم لا اقامة لا علاقات بيزنس مع هاد الدولة. علاش داروه.
اكثر من هاد الشي سبقو رئيس الدولة. الملك دار الفاكسان قدام لمغاربة لخميس للي فات. هما سبقوه. الخميس اللي فات راهم يكونو دارو الڤاكسان الثاني. يعني سالاو كلشي.
احزاب هاد الناس ضاربين الطم. ما هدروش على هاد الفضيحة. هي كتعطي عينة على هاد البرلمانيين اللي جوج منهم نجحو فكازا. دابا هاد العام غاديين يرجعو لاحياء المدينة بشعارات الدفاع عن المواطنين. اكيد يديرو كاع الوسائل باش يوصلو لهدفهم ومن بعد باش يكونو فقائمة المستفدين من اي حاجة.