غير على هادي خاص محاكمة وزير الصحة ديالنا الفاشل. ها سيادو فرانسا بكاع امكانياتهم وبتغطيتهم الصحية المعروفة قررو: الڤاكسان فابور وبالخاطر

هاد الحكومة عندنا فاشلة فكلشي يا السلامة. ياك ديما كيقلدو فرانسا ويتعلمو منها. اليوم الوزير الاول الفرنسي جون كاستيكس كشف على استراتيجية هاد البلاد بخصوص "الڤاكسان" ضد كورونا ڤيروس. الوضوح. ماشي بحال هاداك الوزير الفاشل ديال الصحة اللي كيهدر اما بالفرنساوية واما مع الصحافة الاجنبية على مواضيع كتهمنا. كتهمنا غير حنا.
هاد المسؤول الفرنسي مع وزير الصحة ديالو دار ندوة صحافية كاع. حنا ما يمكنش نهدرو على بنعرفة هاداك مرفوع عليه القلم.
هدر على الاستراتيجية كلها ديال التلقيح. اول حاجة قالها هو ان اللقاح غادي يكون مجاني. فابور. ما غاديش يكون اجباري. كلها بالخاطر. الدولة الفرنسية خصصات 1.5 مليار اورو لهاد الحملة. وهاد الشي غادي يديروه المواطنين فاحياءهم وهاد الشي تكلفو بيه مهنيي الصحة.
دابا هادي ايام خرج وزير الصحة فالحكومة قال بلا حيا بلا حشمة راه الڤاكسان ماشي مجاني. ماشي فابور. على هادي خاصو يتحاكم. فرانسا بامكانياتها. بتأميناتها على الصحة فالقطاع العام وحتى الخاص ومع ذلك دارتو مجاني. دول اخرى دارت نفس الشيء. كيفاش دولة فقيرة باغية الشعب يخلص واللي عندهم لفلوس كثار دايريون فابور.
هاد وزير الصحة ديالنا ضد حتى توجهات الدولة. رئيس الدولة دار اجتماع هادي مدة باش توجد استراتيجية للتلقيح. اش دار لحد الان؟ والو. خرج هاداك الوزير كيهدر ضد هادوك التوجهات اللي كان علن عليها رئيس الدولة. العبث صافي
فعلاقة بالفاكسان٬ فرانسا اكثر من النص ما تايقينش فهاد الڤاكسان٬ على هاد القبال الوزير الاول قال باللي كل واحد دار اللقاح غادي يدار ليه سويڤي.
على شحال من دوز هدر عليها. قال اللي طلبو 200 مليون دوز من اللقاح. عدد فايت حاجيات الدولة. يعني هاد الشي عندهم باش يديرو لمائة مليون فرنسي. حقاش كل ڤاكسان فيه جوج دوز.
هاد عملية التلقيح كيف كشف عليها الوزير الاول الفرنسي غادي يتكلف بيها مجلس التوجيه لاستراتيجية التلقيح. مجلس فيه ممثلي القطاعات المعنية فالحكومة وخبراء علميين وباحثين في العلوم الاجتماعية والانسانية ومهنيي الصحة وممثلي الجماعات المحلية =عمدات= وجمعيات كدافع على اللي المرضى