من غير المس بالمؤسسات.. شكاية جديدة ضد شفيق العمراني "عروبي في مريكان" بتهمة التشهير قريب تحط.. الناشط محمد آدم ل"كود": غنحط شكاية هنا وفسفارة ميريكان ضدو حيت سبني وشهر بيا غير حيت مارست حقي فالولوج للقضاء ضد الريسوني

اتهم الناشط الكويري محمد آدم، شفيق العمراني، اليوتوبر والناشط الحقوقي المغربي المقيم فأمريكا المعروف ب"عروبي في مريكان"، اللي تشد مؤخرا على خلفية فيديوهات كان نشرها وكتمس بمؤسسات الدولة، (اتهمو) ب"التشهير بيه والتحريض ضدو".
وفحديث آدم مع "كود"، قال أنه لحد الساعة ماحط حتى شي شكاية بالعمراني، واخا كان شهر بيه شحال هذي، فالوقت فاش كان دعى الصحافي سليمان الريسوني واتهمو ب"هتك عرضو بالعنف"، وأكد آدم أنه مستعد يحطها بالعمراني الآن، وأن المحامي ديالو غيتكلف باش يحط شكاية فالمغرب، كيف غيحط شكاية اخرى عن طريق سفارة ميريكان.
وتابع آدم أنه ماعندوش علم بالفيديوهات اللي متبع على خلفيتها العمراني، لكن عبر على استغرابو "كيفاش شخص اختار أنه يعيش فبلد يحترم حقوق مجتمع الميم عين وكيجرم خطاب الكراهية ضد الأشخاص بناء على الميول الجنسي والهوية الجندرية والتعبير الجنساني ديالهم، يصدر منو هذ الكلام، "لكن المعني بالأمر اختار الانسياق وراء فكره المتطرف غير آبه بقوانين قد تزج به فالسجن بمدة طويلة"، حسب تعبيرو ل"كود".
وعاود حط آدم سكرين ديال منشور قديم حطو شفيق العمراني كيهضر فيه عليه، ورفقو بتصاور كثار ديالو، وقال بصددو آدم أنه هدف من خلالو للتشهير بيه والتحريض ضدو، بناء على جنسانيتو وجنسو، و"ونعتني فيها بأبشع الصفات لا لشيء سوى أنني قررت اللجوء إلى القضاء وممارسة حقي"، كيف قال فالتدوينة.
https://m.facebook.com/story.php?story_fbid=2892475290987730&id=100006758610630
ومنشور العمراني على آدم كان كلو عنصرية ضد مجتمع "الميم عين"، بحيث وصف فيه محمد آدن ب"الشاذ الجنسي المزغب" اللي "يتحرش بالرجال"، وطنز وقال أن "الشواذ جنسيا مقدسين" و"نبلاء"، وهذشي لأن آدم حط شكاية ضد سليمان الريسوني، وتابعو أمام القضاء.
وغير السبت تشد شفيق العمراني، مباشرة من بعد وصولو لمطار الرباط من بلجيكا، وكشف وكيل الملك فالمحكمة الابتدائية الزجرية أنه "كان مبحوثاً عنه من أجل الاشتباه في ارتكابه أفعالاً تكتسي صبغة جرمية، بنشره مجموعة من الفيديوهات تتضمن عبارات مسيئة ومهينة في حق مؤسسات دستورية وهيئات منظمة وموظفين عموميين".