محمد زيان مازال متشبت بمنصبو كمنسق وطني للحزب المغربي الحر، واخا إسحاق شارية كسب ثقة عدد كبير من المؤتمرين اللي صوتو عليه كأمين عام جديد للحزب نفسو، ودار مكتب سياسي جديد ومقر جديد. لكن مؤخرا، مع انتشار خبر رغبة زيان فالالتحاق بحزب العدالة والتنمية، بان وكأنه استسلم وبغا يخلي الجمل وما حمل لشارية، وهذشي اللي نفاه، فتصريحو ل"كود"، موضحا: "لا ماشي هكذاك، كلامي تفهم فغير سياقو، أنا تبعت خرجة عبد الإله بنكيران اللي قال انه غيقدم استقالتو من حزب العدالة والتنمية إلى فريق الحزب صوت على تقنين الكيف، انا جاوبتو وقلت ليه أنني كنختلف معاه فيما يخص الكيف، وكنتفق فيما يخص الحشيش، ورحبت بيه باش يجي عندنا للحزب المغربي الحر". وزاد زيان أنه كشف لبنكيران النية ديالو فالالتحاق بالعدالة والتنمية حتى هو، إلى وقع شي مشكل فالحزب الحر، "بحال إلى تم حل الحزب، أو أعضاء الحزب والمناضلين ديالو مابقاوش محافظين على نفس المبادئ، او مابقاوش بغاوني، فعندها غادي ننسحب، لكن ماشي اللي دارو داك المؤتمر الوهمي، كنهضر على المناضلين الحقيقيين...، هذوك غنبقاو نناضلو ضدهم حتى لآخر شعرة..."، على حساب تعبيرو فتصريحو ل"كود" وكشف ل"كود" أنه حط 3 شكايات فالقضاء ضد شارية ورباعتو، "من ضمنها دعوى قضائية غتكون الجلسة ديالها ف15 فهذ الشهر، فمواجهة وزير الداخلية وأصحاب السوابق (فإشارة للمؤتمرين اللي حضرو لمؤتمر ضاية الرومي)، ودعوى للطعن فالمؤتمر الوهمي ديال بضع ساعات، وعاد الدعوى الجنحية اللولة ديال انتحال صفة قياديين فالحزب من طرف شي أعضاء مطرودين..."، كيف قال زيان. وبين زيان أنه ماعندوش أدنى مشكل بعد إنشاء المقر الثاني للحزب من طرف خصومو، وزاد: "وداك اللافتة راها دعاية مجانية للحزب، وماكرهناش كون يلصقوها فالمغرب كلو وفليبانو دالإشهار، ويديرو اللي بغاو، وهذشي غير القشور وماكيأثرش، اللي كيأثر هو الحقيقة الميدانية، أما حنا فبغينا غير وزارة الداخلية تطبق قانون الأحزاب.." وحاولات "كود" تتواصل مع شارية باش يعطي إفادتو فالموضوع، كيف سولاتو، عبر تطبيق "واتساب" على الإجراءات اللي ممكن يكون اتخذ بدورو لنزع صفة المنسق الوطني دالحزب من زيان، وحل المكتب السياسي القديم اللي باقي كينشط، لكن ماتلقات حتى جواب. ولحد الساعة الحزب المغربي الحر ولا بجوج مقرات، بجوج لوكَويات، وبجوج أمناء عامين ومكاتب سياسية، وكاينين تنسيقيات إقليمية كتدعم زيان، كيف كاينين التنسيقيات اللي كيدعمو شارية، هذ الأخير اللي فتح باب الانخراط وتجديد الانخراط فالحزب ديالو، كيف قام بفتح تنسيقيات جداد فكل من القنيطرة والجديدة.
