رد على زيان اللي قال بللي خانو.. شارية بعد انتخابو أمين عام ل"كود": الحديث على الخيانة خطاب عاطفي والمشاعر الإنسانية ماعندهاش بلاصة فالسياسة.. وحشومة تكتب تنسيقية إقليمية بلاغها فورقة دالزريعة

فردو على زيان اللي اعتبرو خائن و"طعنو فالظهر" قال إسحاق شارية، الامين العام المنتخب للحزب المغربي الحر، أن هذ الكلام اللي فيه العاطفة والمشاعر الإنسانية ماشادش فالسياسة، وماكيمكنش نخدمو بيه البلاد، وان الحزب دابا عندو اهداف باش يدعم الشباب والمقاولات الصغرى والمستضعفين.
وزاد، فتصريحو ل"كود"، أن الحزب قطع مع عهد زيان اللي كان كيتعتبر الحزب ديالو بوحدو، وأنه دابا فسح المجال للطاقات الشابة.
وأكد أن النصاب القانوني للحزب مكتمل، وأن المؤتمرين حضرو بكثافة، وكاين اللي واكبو نشاط المؤتمر عن بعد، ونفى يكون المؤتمر اللي تم العقد ديالو غير قانوني او منافي للقانون الداخلي للحزب.
وفالندوة الصحفية اللي دارت بعد انتخاب شارية، قال أن الحزب ديالو يميني كحافظ ولبرالي، على اعتبار أن اللبرالية فالعالم عندها طابع يميني.
واعتبر دعم التنسيقيات الإقليمية لزيان مجرد "مزاعم كاذبة"، "وكاين فيها اللي كتبات بلاغها المزعوم فورقة دالزريعة.. حشومة !!"، حسب تصريحو للصحافة.
وقال ان علاقتو مع زيان غتبقى مزيانة، مهما كان، ومرحبا بيه فالحزب فأي وقت.