بنكيران ولوراق اللي اي علاقة: حب قديم. "انتهى الكلام" حتى "تجميد العلاقة" وقطع علاقاتو مع بنعرفة وصحابو. ها منين كيجيب لوراق ديال بياناتو

لرئيس الحكومة السابق عبد الاله بنكيران علاقة غريبة مع لوراق اللي فشي شكل. ماشي اول مرة كيستعملهم. كنذكرو بيانو التاريخي الشهير "انتهى الكلام". هاداك اللي عند"كود" النسخة الاصلية =منشورة مع المقال= كتبها فورقة عادية. طواها وكتب. هاد الشي خلى اول الرسالة على اليسار ولكمالة على اليمين.
لهادي قصة عجيبة. ايام تعيينو باش يشكل الحكومة ف2016. دابا يجي الوقت ونعاودوها. المهم انو كان فضريح محمد الخامس يترحم على الحسن الثاني وكانت وعود جاتو عند طريق سياسي صاحبو باللي الاحزاب اللي كان عرض عليها تشارك =الاحرار والاتحاد الدستوري والحركة الشعبية ... = ما غادينش يديرو بيان. خرج بنكيران من الضريح ولقى البيان خرج. هاديك الساعة خدا هاد الورقة اللي كتشوفو وكتب البيان الشهير.
دابا هادي ايام نشرات "كود" رسالتو اللي قال فيها ايلى صوتو وزراء البي جي دي على قانون تقنين الكيف غادي يعلق عضويتو فالبي جي دي ولا صوتو برلمانيي الحزب غادي يخرج كليا من الحزب.
هاداك نوع من لوراق عند بنكيران بزاف. نفس لوراق كتب فيها تجميد عضويتو فالحزب وقطع علاقتو مع بنعرفة والرميد والداودي والرباح وامكراز.
هاد لوراق حسب معطيات عند "كود" هو اللي كيتكوغط فيهم الجرائد اللي كتجي لبنكيران يوميا لدارو. وفق مصدر "كود" هادوم ماشي ديال الزبدة ولكن كيتغلفو بيهم الصحف. اللي عندو اشتراكات مع بائع صحف كيعرف هاد الشي.
وفق مصدر "كود" فينما وصلات بنكيران الصحف كيفتح داك الشي يقراه وكيجمع هادوك لوراق. عندو بزاف دابا. السيد وفق مصدر "كود" ما عندوش مع تضياع لوراق.
طبعا هاد لوراق عندهم معنى. يكتب فيهم سياسي بحجم بنكيران راه اهانة لهادوك اللي جبدهم. نوع من الغضب الانفعالي الاني ما يبردو الا كتابة استقالة او تجميد عضوية بهاد الطريقة.
طبعا عامل الوقت والسرعة كتخليه يستغنى على اعادة كتابتها في وورد. هو عزيز عليه الكتبة بهاد الطريقة.