ما حشمتوش يا البي جي دي. شكون داير علاقات تجارية مع اسرائيل ماشي حكومتكم. علاش ما سولتوش حتى دياولكم واش وقعو بصاح ولا ما فراسشهم كاع هاديك اللائحة

الموقع الرسمي لحزب العدالة والتنمية تبنى بيان دارتو شي جمعيات ورؤساء هاد الجمعيات اللي مجموعين فالائتلاف. العنوان كيضحك ديال موقع حزب رئيس الحكومة. قال "هيئات وشخصيات حقوقية مغربية تدين تطبيع موقع "كود" مع الكيان الصهيوني". اييه كتبوها.
دابا اجراء حوار مع مسؤول اسرائيلي بحال كدير حاضنتهم "الجزيرة" ولا اعلام اردوكان ولى تطبيع. علاش ما عمرهم خرجو شي بيان فهاد الاتجاه. نخليو هادي. نشوفو ما هو اهم. اش نا هو التطبيع. واش اجراء حوار ولا تكون مبادلات تجارية بين الرباط وتل ابيب.
المغرب عندو معاملات تجارية مع اسرائيل. كاين سياحة اسرائيلية للمغرب. هاد الشي كاين فحكومة كيرأسها البي جي دي. هادوك اللي الموقعين كيهدرو على شركة من الشركات. واش هاد الشي حسب فهم البي جي دي "تطبيع" ولا ممارسة عادية فمصالح الدولة ونعاودها شكون اللي كيدير هاد التطبيع؟ نفس الشي على شي استقلاليين. راه كانت الحكومة حتى 2011 استقلالية وكان التعاون المغربي الاسرائيلي وما عمركم دنتوه.
وحاجة اخيرة. كان هاد الحزب يحشم على عراضو. ما طالبينش منو يدير الصحافة حقاش هو موقع حزبي٬ ولكن غير يتاصل بمنتدى الكرامة وبعبد الصمد الادريسي ديالكم اللي من حزبكم. سولوه واش فراسو انو وقع هاديك العريضة ولا تفاجأ باسمو واسم المنتدى؟ ما طلبناش منكم تسولو لخراين وغير ديالكم. غاديين تعرفو باللي ما فراسوش ودارو اسمو. اييه ممكن يكون متفق على هاد الشي ولكن ما سولو حد على واش يديرو اسمو ولا اللا.