نفاق سياسيين: خايفين من مواجهة لفتيت وكيقلزبو تحت الجلابية. كيفاش ناس البي جي دي والاتحاد فالحكومة وهما صحاب "التعاقد" مع الاساتذة كيقولو على احتجاجهم "مشروع" وحنا فحالة طوارئ

كتبت القيادية في البيجيدي أمينة ماء العينين تدوينة معلقة على ماحدث في الرباط من منع وقفة للاساتدة المتعاقدين، وقالت فيها : الاساتذة مارسوا حقا مشروعا في التظاهر و الاحتجاج السلمي و انها ستمارس واجبها في مساءلة الحكومة و بقات كتمنعني على الداخلية انها تخرق القانون. وقالت أنه لا وجود لدولة ديمقراطية بدون الاعتراف بحق الاحتجاج. قبل كتبات حنان رحاب برلمانية الاتحاد الاشتراكي ومعاها اتحاديين اخرين مدافعين على مسيرة زمن الحايجة. اييه وخرجو العين
أولا، خصنا نعرفو أن الدولة جهاز ومؤسسات عصرية تحتكر العنف وتسميه عنف مشروع، هذا نقاش فلسفي قديم، كيفاش بغيتي الدولة تنفذ القانون دون عنف سواء جسدي أو رمزي؟ اذا تطعن في هذا الحق فانت اصلا بلا مانكملو معك النقاش، غادي تولي محسوب على الاناركية الي هي براسها لا تنفي ضرورة العنف المشروع..
حق الاحتجاج كاين ومكفول في كل الدولة ولكن ليس مطلقا، فيه ضوابط وهادشي في كل دول العالم، خص إخبار السلطات المحلية بمكان وزمان ومنظم الوقفة، و الا كنت مسيرة يجب طلب ترخيص، ماشي كتطلب الاذن من الداخلية ولكن غير باش يعاونوك على حسن سير التظاهرة ديالك، و ينظمو السير او يمنعو مرور السيارات و يحميوك مثلا..وفي المغرب تنظم وقفات ومظاهرات مرخصة بالعشرات كل شهر ابتداءا من مظاهرات فاتح ماي و غيرها .. الا مادرتيش هادشي كتمسى وقفة غير مرخصة و خارج القانون و بالتالي يا أستادة امينة، كيبقا التقدير لوزارة الداخلية، واش تميك و تسمح لعدة اعتبارات بهذه الوقفة، ولا تمنعها، و المنع يتم بالفض ووفق اجراءات باينة ، الفض يتم بالعنف و الدفع و الركل و الضرب..كيفاش بغيتيهم يديرو هادشي بدون عنف خصوصا ان عدد المتظاهرين يكون دوما اكثر بالاضعاف من القوات العمومية.
نعم، كاين اخطاء تقع اثناء الفض، ويجب ادانتها، مثل التحرش او الضرب الشديد في مناطق حساسة أو سرقة الهواتف ، و كاين حتى الخطأ اللي وقع مؤخرا وهو استخدام اعوان السلطة غير المؤهلين..
وقفة الاساتدة المتعاقدين لم تكن مرخصة، الناس ماطلبوس ترخيص ولا دارو اخبار، غير تجمعو و جاو للرباط، السؤال علاش هاد التعالي على القانون؟ زعما مارضاينيش وبغاو يفرضو الامر الواقع؟ انها نزعة قديمة من اليسار المتطرف اللي زعما لايعترف بالدولة و كيدير الوقفات وقتما رشفات ليه..وهو نفس اليسار اللي كايطلب الترخيص لجميع وقفاته في الدول الاوروبية، و على ذكر هاد الدول الاوروبية، راه نفس الشيء عندهم:بغيتي تدير وقفة دير اخبار، ماديرتيهش العصا غادي تلقاها كتنساك بل ونكونو صريحين، العنف الذي تستعمله الشرطة في اوروبا اشد من اللي كايكون ف المغرب، سواء في امريكا فرنسا او اسبانيا او هولندا او بلجيكا، كايكون استعمال الخيول و الكلاب و الماء و الرصاص المطاطي و الا حس شرطي بالخطر على حياته يقدر يستعمل الرصاص.. بالاضافة لانهم كايعتقلو المشاركين و يتم متابتعتهم قضائيا، الامر اللي ماكيديروهش ف المغرب. و المنظمات الحقوقية العالمية و الله مكتسوق لهادشي لانها تعتبرها عادي، العنف الممارس لفض الوقفات ماشي دليل على اي حاجة،لا على نقص في الديمقراطية ولا على خلل في منظومة الحريات..
ثانيا، كاينة حالة طواريء صحية اقرتها الحكومة اللي تنتمي لها ماء العينين، وتفترض عدم التجمع مخافة انتشار الفيروس، اذن علاش الكلام عن مظاهرات ولا وقفات حاليا؟
البيجيدي ومعاه الاتحاد الاشتراكي للي كان كيسعى يدخل الانتخابات ودابا كيسمي اللي وقع بالشرعي والقانوني. هادو بجوج غير قربات الانتخابات ثاني، ودايرين رجل هنا و لرجل لهيه، وبغاو يركب على احتجاجات هاد الفئة، و لا كايديرو مناوشات جبانة مع لفتيت. ما عندهمش هادوك باش يواجهوه.