كيفاش مول كلينيك فكازا اسمو التازي بغى يركب على كورونا فيروس ودار هاد لفضيحة (تصاور)

هناء ابو علي صور باجوري عبد الرحيم وكالة ايس برس ///
كاينين صحاب لكلينيكات ما كيحشموش. مقصدرين. باغيين يديرو الدعاية بكلشي. الدعاية حتى بمرضى كورونا فيروس. هادا ما دار هاداك المدعو الحسن التازي اللي كانت المصحة ديالو من اللكينيكات اللي خداتهم الدولة ودارت فيهم المرضى ديال كازا.
اليوم استغل استغلال حقير بزاف هاد العمل. استغلو وممكن يدير كارثة حقاش دار تجمع. ما عرفناش علاش السلطات فكازا سمحات ليه. علاش مندوبية الصحة خلات هاد التخربيق.
رسل بيان فالفقرة الاولى كاين اسمو جوج مرات. كيكول للمصورين للصحافيين اجيو مع هاد الوقت غادي يخرجو 4 الحالات. ضحك على كلشي حتى على المرضى. كيفاش توظفو باش يديرو الدعاية لكلينيك ديالو. لبسهم وعطاهم الراية وصورة الملك ووقف بزاف الصحافيين والمصورين باش يصورو الكلينيك يصورو اسم لكلينيك.
خاص وزارة الصحة تفتح تحقيق فهاد الفضيحة. مندوبة وزارة الصحة فكازا اللي دارت خدمة مزيانة تضرب ليها كلشي فزيرو بممارسة بحال هادي. كيعطي صورة مزيفة. كيقول للناس راه حنا اللي عالجناهم. هاد الشي ماشي بصاح ولكن هادا اللي غادي يبقى.
شكون يوقف هاد الجشع ديال امثال صحاب لكلينيكات عند حدو.
هاد بنادم يمشي يخلص اولا ضرائبو. يخلص للي عليه ماشي يوظف هاد الحايجة باش يلمع صورتو وصورة قطاع مقودة بزاف عند لمغاربة