ليومينا هادا كايعتابروا جل المغاربة الإنتحار طابوه اللي من المفروض ما يتكلموش عليه، ولاكن مع كولّ الأسف موجود أو منتاشر عندنا أو كايزيد ينتاشر، غير من "الربيع المغربي" ألْدابا نتاحروا كثر من 100 شخص، حالات الأغلبية الساحقة مرتابطة بالظروف الشخصية، إمّا ظروف مادية، نفسانية، عائلية ولا ّ سياسية. أو اللي كايحرق راسو كايبغي إقول لينا النار اللي شاعلة فيه ما كرهش يشعلها فى اللي سبابو، يعني ضد اللي ظالمو، حاكرو، أو اللي كايتخد هاد الطريقة باغي إثير، إهيّج شعور الناس، يخلق نوع من الضغط النفساني على المحيط اللي كايعيش فيه، العامل الأساسي اللي كايدفع الفرد إقوم بهاد العمل هو فى أول الأمر "عدم الرضى على الوضع" إيلا كان الشخص كايتوفر على كامل الأهلية، لأن فى غالب الأحيان الأفق المسدود، عدم التجاوب مع تطلعات الفرد، مجتمع خشين كايشجع على الضرب، الجرح، الكراهية أو التكفير كايأدي "حتما" ألهاد المأسات اللي كانعيشوا اليوما. الأغلبية الساحقة ديال الناس اللي حرقوا راسهم كانت عندهم رغبة إعدّبوا اللي عدّبهم، تكرفصوا عليهم ولوْ معناويا، هادا نوع من أخد الثأر، مع الأسف كثير ديال الناس ما غاديش إعجبهوم الحال: المجتمع المغربي "مريض" أوخصّو اللي إداويه، بلا ما نمشيوْا بعيد، الحكرة عايشة فى وسطنا، القوي واكل الضعيف، أو اللي عندو علاش إتّكى ما بقى كايسمع ألْحد. كون كان المغرب كايتوفر على تعليم متين، محصّن بالعقل، كايكوّن أجيال اللي يمكن لينا نبنيوْا بيهم البلاد، نطوّروا بيهم مهارات أو هاد النبتة الطيبة، الديمقراطية الحقيقية، اللي كاتهدّن الأعصاب أو كاتعطي ألْكول واحد حقّو، كان كبير ولا ّصغير، أقلية ولا ّ أغلبية، قوي ولا ّ ضعيف، غالب ولا ّ مغلوب، كون كان المغرب دولة مصنّعة ماشي ترتارة بحال السياسيين دياولها، ما عندها ما تدير بالهضرة الخاوية، ما غادي إكون حتى شي داعي ولا ّ مبرر ألْهادا ولا ّ لاخور باش ينتحر ولا ّ يركب فى بارْكو ما نقدش راسو عاد ينقد الغير. التعليم ضروري إكون بلغة مفهومة واردة فى الحياة اليومية ديال كول مغربية أو مغربي، وإلا ّ ما كاين حتى شي زدهار، لا مادي، ثقافي ولا ّ معناوي، لأن جميع العلماء الكبار كيف كايهضر الشعب ديالهم كايكتبوا، أو هاكدا علاش ناجحين، أمّا المدرسة المغربية كاتكوّن غير البؤس، البطالة، الهدر المدرسي، العنف، التطرف، الأفق المسدود، الإنتحار، أو هي المسؤولة اللولة على هاد الوضع الكارثي. لحد الآن ما عارفينش بالضبط ملابسات قضية الأخ محسن فكري اللي مات فى الحسيمة، أو إيلا ستعملات بالفعل القولة التالية "طحن أمّو"، هادا ما كايدل غير على نموذج من الخصل الطيبة المغربية الأصيلة، العنف اللفظي، الجسدي متجدّر مع الأسف فى المجتمع المغربي، أو قبل ما نلوموا هادا ولا ّ لاخور، نشوفوا عيوبنا عاد نشوفوا عيوب الناس. الإحتجاج السلمي ضروري أو مكفول من الناحية القانونية، ولاكن يعمل شي حد ّ شرع يدّيه، هادا غير مقبول فى دولة الحق أو القانون، ولو ما إعجناش الحال الدولة بوحدها اللي خصّها يبقى بين يديها الحق فى ستعمال القوة إيلا قتضى الحال. على ما كانضن، الأخ محسن طلع ألْعصارة الزبل باش إعبّر على سخطو، يعني إيلا بغيتو تدّيوْا ليا سلعتي خودوني معاها أو اللي حصل من بعد معروف، ضروري على المسؤولين يتعاملوا مع المواطنين بحساسية كبيرة، لأن التعنيف ما كايزيد غير إعقد الأمور، اللي فى الأصل معقدة ألدرجة أن المحتجين كثر من اللي كايلقاوْا الخدمة، ما كاين ما يدّار، أو هادا راجع بالأساس ألْتعليم فاشل أو غادي يبقى فاشل، ما حدّنا ما ستعملناش لغة محبوبة، كاتصلاح، التعليم الناجح باللغة الناجحة هو أساس، ركيزة الدولة، لأنه بيه كاتكون اللي بغيتي: الطبيب، الطبيبة، المهندس، المهندسة، الجادارمي، الفرملية، الطيار، المعلوماتي إلخ، التعليم الناجح مفتاح الفرج، المعرفة، الإزدهار الإقتصاديي، أمّا التعليم المشوّه ما كايأدّي غير للتمرّد، الفقر، العبودية اللي باغي لينا التيار المحافظ. علاش نجح بن كيران أو حزبو؟ لأنه كايهضر لغة الشعب فى البرلمان، التجمعات الخطابية أو فاين أمّا رشقات ليه، ولاكن فى نفس الوقت كايتحايل على لغة المغاربة اللي طلّعاتو ألْسدة الحكم، أمّا إقول لعشيرتو، ما تهبطوش للشارع أو ما أضّامنوش مع محسن فكري، هادا غير تاكتيك، مناورة سياسية باش يدخول فى مساومة، يحصل على متيازات جديدة أو رضى القصر. أكيد كون عرفوا المسؤولين يتعاملوا مع محسن فكري ما عمّرو يطرى ليه اللي طرى دابا، لأن حتى هادوا اللي عطاوْا هاد الأوامر طرف من هاد المجتمع، يعني المجتمع كاكول ّ مسؤول، العنف وارد عندنا فى الوسط المغربي، حتى التطرف، كون ما كانش ما عمّر الألوف من المغاربة يمشيوْا حتى العراق، سوريا باش إساندوا الدواعشة أو الإسلام السياسي، أمّا العنف الإليكتروني لا تهضرش عليه، ما كاين ضرب خوك من الحزام ألّتحت، فرض الوجود، الذات، الآنا المغرورة بهاد الطريقة ما كاتأدي غير ألّخراب، الهلاك، التفتت أو التسيب، اللي ضروري نحاصروه بفضل جميع مجهودات القوات الحية اللي كاتخزر بيها المملكة المغربية.
